Sa maliu se tamaititi 15 tausaga mai le afioaga o Asau i Savaii ina ua tanumia i sima ina ua palasi ane iai se fasitepu sa malolo ai i lalo.
Sa faamaonia mai e le Komesina o Leoleo Auapaau Logoitino Filipo, o le faaiuga o le vaiaso ua tea atu nei sa logoina mai ai lenei faalavelave.
Saunoa Auapaau, “E toalua ni tamaiti na agai e la’u oneone. O le isi e 15 tausaga ae o le isi e 16 tausaga”.
O se fale tuufua e lē o toe fa’aogaina, e faapea sa iai se fasitepu sima sa mapu ane iai le fanau lenei, ma malolo ai mai le aasa o le lā.
Peitai na pa’u ifo le fasitepu ma tanumia ai i la’ua.
O inā lea sa maliu ai le tamaititi 15 tausaga, ae man’ua tigaina le isi tamaititi 16 tausaga.
Ua ma’ea suesuega a leoleo ma ua faamalieina foi le pule o maliu (coroner).
Ua maea foi ona tuuina atu le faatagaga e mafai ai ona aveese le tino o lenei tamaititi aua toe sauniga a aiga.
I le alia’e mai o lenei faalavelave ua aumai ai ma se tuualalo a le Matagaluega o Leoleo e tauala mai le Komesina mo matua o Samoa.
“Ia tautuana e outou matua lou tiute o le vaaia o fanau..
“Afai o ni galuega poo ni feau e mamao ese ma le aiga, e tatau lava ona iai se tagata matua e agai faatasi ma i latou, mo le vaaiga o le saogalemu o fanau”.
Sa momoli foi le faamafanafana a le Komesina mo aiga ae maise matua o le fanau ua aafia.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
