Fautuaina e le Matagaluega o le Soifua Maloloina le Vave Tapunia o Aoga

0
2191

Ua tuuina mai le fautuaga a le Matagaluega o Soifua Maloloina i le Matagaluega o Aoga faapea Aoga Tumaoti ma Aoga Ekalesia mo le vave tapunia ai o Aoga Amata, Aoga Tulagalua faapea ma Aoga Maualuluga i Samoa i le maea ai o suega o lo’o faagasolo i le taimi nei i le faamai pisi o le misela.

O le ripoti o le tulaga ua iai le pipisi o le Misela i Samoa e fa’aauau mai i le Pepa o Fa’amatalaga lona 4:

O fa’amaumauga o le tulaga ua iai nei;

  • O le aso 27 o Oketopa na faamauina ai le 314 tagata ua masalomia ma le toa 15 ua faamaonia. E 146 isi toto o loo tᾱlia se faamaoniga mai Ausetalia.
  • I le taimi nei e toa 3 ua maliliu e masalomia ua maua I le misela I Samoa; o le tamaititi e 14 masina, o le 8 masina ma le tagata matua e 37 tausaga. O loo talia pea se faamaoniga mai Ausetalia.
  • Mai le 314 tagata masalomia; e 176 (56%) o tamaiti e I lalo ifo o le 4 tausaga (0-5 months, 11%; 6-11 months, 15% and 12 months to 4 years, 30%) ma le 40 (17%) e I le va o le 20-29 tausaga le matutua o loo tele ina aafia.
  • E 249 (79%) I latou ua faamauina I Upolu ae 57 (18%) I Savaii ua masalomia I le misela.
  • E 91 o le 314 sa taofia I le falemai mo togafitiga ma o le toatele ua manuia ma tete’a I tua.

O lo’o avanoa le auaunaga ma fa’atino a tatou tui puipui o le Misela i Falema’i uma o Upolu ma Savaii e aofia ai;

  • Falema’i tele i Upolu o le Tupua Tamasese Meaole. O lo’o fa’atino tui puipui i autafa o le Vaega o lo’o fa’ao’o ai gasegase fa’afuase’i (Emergency Department)
  • Falema’i tele i Savaii o le Malietoa Tanumafili II. O lo’o fa’atino tui puipui i autafa o le Vaega o lo’o fa’ao’o ai gasegase fa’afuase’i (Emergency Department)

E lua (2) vaiaso faatoa ato’atoa le aogā o le tui puipui ma e tatalo atu ai le mamalu o le atunu’u ina fautuaina le tausisia o puipuiga i le lua (2) vaiaso pe a ma’ea ona fa’atino lou tui puipui.

Misela ma lona Puipuiga Lautele:

Natura o le Misela

O le misela o se vairasi e pipisi tele. E pipisi mai le tagata ua a’afia ma feavea’i e le ea pe a tale, mafatua pe manava fo’i. E taua le nofo uta o tagata uma i auga ma foliga vaaia o le Misela.

Auga/Foliga Vaaia o le Misela:

O foliga va’aia muamua o le Misela e aofia ai le; maualuga o le fiva, tafe le isu, mūmū ma suavaia pe tīgā mata, tīgā mata pe a taia i le malamalama. O le pata o le tino e alia’e pe a ua maua se tagata i le Misela i totonu o le 3-5 aso e amata mai le ulu, faasolo atu i foliga ma le ua, ma aofia ai le tino atoa. E le o auga uma po’o foliga vaaia o le Misela e alia’e ma vaaia pe a ua a’afia se tagata.

Fautuaga mo i latou ua a’afia pe ua alia’e foliga vaaia o lo’o taua i luga:

  1. E fautuaina malosi le iai o se potu po’o se vaega o le fale e mamā e tu’u esea ai le tagata ua a’afia
  2. E taua le taumafa o le vai auli mamā po’o se niu.
  3. Inu le fualaau mea tiga pe fa’ainu vai o mea tiga a fanau laiti pe a fiva. E taua le fa’amālū o le tino ma ia mautinoa ia lava le vai i le tino.
  4. Pupuni lou fofoga pe a tale pe a mafatua fo’i i se solosolo po’o solo pepa mama po’o se mask
  5. Taofi fanau i le fale e aua le avea i le aoga po’o potopotoga e tumutumu ai tagata pe a ua maua i auga nei.
  6. E fautuaina le nofo i le fale ma fa’amamao ese mai vaega o lo’o tumutumu ai tagata pe a ua e a’afia ma maua oe i auga o le Misela.
  7. Vave vaai se foma’i pe a ua ogaoga a’afiaga

Fautuaga mo le Puipuiga Lautele o le mamalu o le atunu’u:

  1. Taofi le feoa’i i vaega e tumutumu ai tagata
  2. Pupuni lou fofoga pe a tale pe mafatua fo’i i le solosolo po’o se pepa solo mamā e fa’aititia ai le pipisi o siama
  3. Taofi fanau i le fale pe a ua masalomia pe ua alia’e fo’i auga o le Misela
  4. Aua le faigaluega, pe nofo fo’i i le fale pe a ua alia’e ni auga o le Misela
  5. Mautinoa ua fai tui puipui a fanau laiti e tusa ai ma aso ma tausaga fa’atulagaina o le Tusi Tui a Tamaiti
  6. Ia mautinoa ua fai tuitui puipui a fanau laiti ua 6 masina ma luga atu le matutua
  7. Ia inu le vai auli mamā i taimi uma
  8. Aua le momoe fa’atasi pe afai ua masalomia ua a’afia se tagata pe inu ma aai i le ipu ma le sipuni e tasi. Aua le feinu i le fagu e tasi
  9. Ia mautinoa le fufulu mamā o lima i se fasimoli ma vai mamā i taimi uma o le aso aemaise pe a uma ona tale, mafatua po’o le tausiga fo’i o se tasi ua a’afia i le Misela.

Mo tagata e le tatau ona faia tui puipui e aofia ai:

  1. Fanau laiti e i lalo ifo o le 6 masina le matutua
  2. Tina ma Tama’ita’i to
  3. O tagata o lo’o iai fa’afitauli o puipuiga fa’alenatura pe fa’avaivaia le tino ona o ma’i tumau
  4. O tagata o lo’o iai fa’amaumauga e iai a’afiaga pe a fai tui pe a inu ni fualaau

E fautuaina le vave logoina o se tausi soifua po’o se foma’i pe afai e iai ni ma’i tumau po’o nisi gasegase o lo’o a’afia ai e pei o le ma’i suka ma le toto maualuga ae le’i faia le tui puipui o le Misela.

Fautuaga;

  • E fautuaina le siaki muamua pe ua fa’atinoina tui puipui a le fanau e tusa ma aso ma tausaga fa’atulagaina o lo’o i totonu o le Tusi o Faamaumauga o Tui Puipui.
  • Afai e le’i fa’atinoina se tui puipui o le Misela pe le’o mautinoa fo’i, e fautuaina le fa’atino o le tui puipui i totonu o le 2 vaiaso ae le’i malaga ese atu se tagata i atunu’u i fafo.
  • Ua fautuaina foi le Matagaluega o Aoga faapea Aoga Tumaoti ma Aoga Ekalesia mo le vave tapunia ai o Aoga Amata, Aoga Tulagalua faapea ma Aoga Maualuluga i Samoa i le maea ai o suega o lo’o faagasolo i le taimi nei.

Mo nisi fa’amatalaga fa’amolemole fa’afeso’otai le Matagaluega o le Soifua Maloloina i le 68100 po’o le 21212. Mo se fesoasoani fia mana’omia vave po’o le fia vaai o se foma’i fa’afeso’otai sui o le Matagaluega o lo’o taua i lalo po’o se falema’i lata ane;

Tagaloa Dr. Robert Thomsen – telefoni: 66503/7676015
Tevaga Dr. Ponifasio Ponifasio – telefoni: 66500
Dr. Sarah Brown – telefoni: 66723