Fasi Toatele ma Faataatitia i le Aualatele i Pesega

E tele taavale sa lata ane i le aualatele sa fasi tele ai nei taulelea, peitai, e leai se isi na taumafai e taofia pe fesoasoani atu iai.

0
4723

E toalua ni alii sa faamanu’alia ina ua fasi toatele i laua, ma faataatitia i luga o le aualatele i Pesega i le afiafi o le Aso Toanai 23 Mati 2024.

I se ata video na pueina ma faasalalauina i luga o upega tafailagi, na iloa atu ai le ogaoga o le faaoogalima o loo faatino e nisi o alii – pe maua lava le toafitu o latou.

New arrivals at SOS Togafuafua and Salelologa.

O loo iloa atu i le ata video le matuia o le faaoogalima, ae maise o le takiki o ulu o ē o loo taatitia i luga o le alatele, e ui lava o loo aunoa ma se tasi o loo minoi (motionless).

O se tasi o alii ofutino paepae sa ia takiki ia i laua o loo taooto e le o toe minoi.

O loo iloa atu fo’i i lea ata video le tumu o taavale o loo tutu i autafa ane, peitai, e leai se isi na oo ane e fesoasoani, pe taumafai foi e taofia le faaoogalima na fa’amanualia ai nei taulelea.

I le taimi na fesootai ai ma le Komesina o Leoleo i le Aso Gafua 25 Mati, sa tā’ua ai e Auapaau Logoitino Filipo, e le’i iai se isi ua molia i lenei faalavelave, ae o loo faagasolo pea suesuega a leoleo.

Saunoa fo’i Auapaau, o loo suesueina fo’i e leoleo se pikiapu, laisene numera 28636, lea o loo faapea mai nisi o le mamalu o le atunuu, sa uta uma iai le toafitu pe sili atu foi, lea sa faatinoina le faaogalima.

O nisi sa molimauina lenei faalavelave sa latou valaauina le 911 ma tali mai ai le FESA (Fire and Emergency Services Authority).

Sa oo atu le auaunaga a le FESA ma faataunuu le fesoasoani muamua, ma avatu ai loa ē sa aafia i le faleemai mo nisi togafitiga.

 

O se vaaiga lea i nisi o aualii sa faia le faaoogalima.

Ae ua saunoa le Komesina o Leoleo, o loo talia se taimi e faatalanoaina ai taulelea sa aafia, pe a mapu mai i o latou manuaga.

O loo masalomia sa faasuaava nei taulelea, ma latou palauvavale i taavale ma pasi ane. O loo tā’ua fo’i e nisi o molimau, o i latou uma e faigaluega faatasi i se faletalimalo.

Public Notices