Falepuipui se Tamā na Maliu ai lona Atalii 12 Tausaga

"o le faaoo manu'a tugā ua mafua ai le maliu o le atalii, ma o se feau tāua foi lea mo matua uma o Samoa"

0
1101

Ua tuuina mai e le Faamasinoga Maualuga se faasalaga falepuipui e fā tausaga ma le 10 masina mo se tamā na ia faaoina le maliu i lona lava atalii e 12 tausaga.

O Tesema 2022 sa tula’i mai ai lenei faalavelave i Palisi ina ua molia e leoleo le tamā ia Toma Akuino Tovia, 39 tausaga mai Palisi, i lona faaooina o manuaga tugā i lona atalii.

E pei ona saunoa le Sui Komesina o Leoleo iā Papalii Monalisa Tiai Keti i lena taimi, “O suesuega ma moliaga a le Matagaluega e fua i manuaga sa vaaia i le tino o lea atalii..  o se mea faitino malō (hard object) sa fa’aogaina e lea tamā e sasaina ai pe faaoolima ai i lona atalii.”

I taualumaga o le faamasinoga na tā’ua ai o le ogaoga o manuaga i le ulu o le atalii e tusa ma le lipoti a le falemai, lea na mafua ai ona maliu.

Sa vaaia i totonu o le potu faamasino le tutulu o lea tama ma ia faailoa i luma o le Faamasinoga, o ia e alofa i lona atalii.

Sa ia sasaina e aoai ona ua tautalaititi, ae na te le’i mafaufauina o lana sasa o le a oo i se tulaga ogaoga.

“O le faiga lava lea o la’u fanau e nanā le alofa ae sasa ma faatonu..”

I le tuuina mai o le faaiuga a le Faamasinoga na saunoa ai le tamaitai faamasino iā Niava Mata Tuatagaloa, e le avea le sasa aoa’i e tuu avanoa ai le tulafono.

Tā’ua e le afioga i le Faamasino, o le faaoo manu’a tugā, ua mafua ai le maliu o le atalii, ma o se feau tāua foi lea mo matua uma o Samoa, aua e le ‘alo le tulafono e faatino faasalaga talafeagai mo soligatulafono nei.

O le mau a le Faamasino Sinia o le Faamasinoga Maualuga (Senior Supreme Court Judge) le afioga iā Vui Clarence Nelson, e lē tatau ona faaaogaina le sasa e a’oa’i ai le fanau, ona e eseese uma fua a tagata i le mamafa o le tā.

I sana saunoaga e tuuina mai lava i soo se taimi e faatalanoa ai lenei mataupu, e faapea mai ai le afioga i le Faamasino Sinia, “E ta’u e outou o le sasa, ae ‘ou te ta’uina e a’u, o le faaoolima, ma o le solitulafono foi lea.”

“You call it sasa, I call it assault; a crime punishable by law.”

Faasalalauga Faalauaitele – Public Notices: