Falepuipui i le ta’i 10 ma ona tupu tausaga ni tamā fai amio matagā i afafine fai

0
2612

O le aoauli ananafi lea na fofogaina ai i luma o le Fa’amasinoga Maualuga ia i’uga mo ni tamā se to’alua ina ua fa’amaoniaina o la moliaga o le faia o ni faiga’aiga fai fa’amalosi ma o la afafine fai, ae le gata i lea o sauaga mataga tau feusua’iga.

O nei fa’asalaga uma na fofogaina e lana Afioga i le Tama’ita’i Fa’amasino ia Tologata Tafaoimalo Leilani Tuala-Warren.

E 13 tausaga o le afafine fai o Opeta Tuiavii, o le sa avea ma faifeau o le Ekalesia Aso Fitu i Falealupo, ae sa fa’amaloloina mai ona tofiga ma lona faletua muamua lea ua lā tete’a.

O le valu tausaga mulimuli ane na toe faia ai se to’alua o lenei alii ma o lenei tina e to’alua lana fanau teine i lona to’alua muamua.

Opeta Tuiavii

O le tama teine e 18 tausaga a le toalua lona lua o  lea sa aafia i lenei mataupu. Sa taua i tolaulauga o le faamasiniga ni faiga’aiga fai fa’amalosi na fa’atinoina e Tuiavii i le va o le aso 31 o Iulai aga’i i le aso 01 o Setema o le tausaga e 2014.

Sa umi tausaga e lei lipotia lava e seisi, ae o le tausaga lea na tea sa faatoa momoli mai ai loa lenei mataupu i leoleo.

Sa faafiti lava Tuiavii ma ia tu’ua’ia e fa’apea, ua mafua ona tutupu nei fa’afitauli ona sa fa’aali atu e le teineititi na a’afia ia te ia lona itutino sa ma o le mafua’aga lea na faia ai loa ni la feusua’iga (se’i tulou).

E lei taliaina e le Faamasinoga lena faamatalaga, ma tuuina mai ai loa se fa’asalaga i le to’ese mo le umi e 10 ma le ‘afa tausaga.

Na tu’uina atu e le Afioga ia Tologata Tafaoimalo se fe’au taua ia Tuiavii aemaise o tagata uma o lo’o mafaufau e fa’atino nei ituaiga soligatulafono mataga fa’apenei o lo’o a’afia ai pea fanau teine laiti.

Saunoa le Faamasino, e le ‘alo le Fa’amasinoga e tu’uina atu pea fa’asalaga talafeagai e iloa ai e nei tagata o lo’o faia nei soligatulafono, le ogaoga o le talepe o le fa’atuatuaga o lo’o tu’uina atu iai e teineiti o lo’o a’afia, aemaise o i latou o matua, e tatau ona malu le fanau i le latou puipuiga.

E 18 tausaga le fa’asalaga amata na fa’aaogaina e le Afioga i le Tama’ita’i Fa’amasino fua i le vaega tolu (band three) o le fa’atulagaga o soligatulafono tau faiga ‘aiga fai fa’amalosi.

Na to’esea mai nisi o tausaga ona o le ifoga na fa’atino e le tama lenei na molia, faapea ma le tala’aga lelei o lona soifua aemaise o le vave ona ia ioeina o moliaga sa faia fa’asaga ia te ia e tauala atu i lana loia ia Fuimaono Sarona Ponifasio.

O le lona lua o tama na tu’uina atu i le to’ese mo le 15 tausaga o le alii o Korama Tafola Eli.

 

O lea alii 34 tausaga o lona soifua, ma e to’afitu le fanau.

E pei ona lipotia e le Samoa Global News, o tolaulauga o lenei mata’upu o lo’o ta’ua ai e fa’apea, sa fa’atino e Korama ia uiga mataga i lona afafine fai e 8 tausaga le matua, i le va o le aso 31 o Tesema ma le aso 1 o Ianuari o le tausaga ua te’a.

Sa ave e lenei tama lona afafine fai e la te tae popo i lo latou fanua, ma ia faatinoina ai loa ni amioga mataga ina ua ia tuu lona itutino sa i le gutu o le teineititi.

Sa te’ena malosi e le alii lenei tu’ua’iga ma moliaga fa’asaga ia te ia. O lana mau, o nei mea uma sa fafau e le tinā o lona to’alua,  ona e ita tele le loomatua ia te ia.

O lenei alii e mai le afio’aga o Neiafu i Savaii ma e o’o mai lava i le taimi nei o lo’o ia fa’ailoa lava e mama lava o ia ma nei moliaga.

Peitai o le masina o Oketopa lea na fa’amaonia ai moliaga e lua o feso’ota’iga tau feusua’iga ma se teineititi e i lalo o le 12 tausaga le matua, ma le isi le moliaga o amioga mataga i se teineititi e i lalo o le 12 tausaga le matua. Sa faamamafa foi e le Faamasinoga, o le afafine sa tu’uina atu i lalo o lana va’ava’aiga, ma o ia o se tamā fai.

E 15 tausaga se fua amata o se fa’asalaga fa’afalepuipui na tu’uina atu mo Korama ae sa to’esea mai le ono masina i lona tala’aga lelei, le isi ono masina i lipoti lelei o lona tagata na tu’uina atu i le fa’amasinoga ma le tausaga e tasi na to’esea ona o le fa’ato’esega a le tamā o le o lo’o molia, na faia aga’i le aiga o le teineititi na a’afia.

E 13 tausaga lea ua tu’uina atu e le tama’ita’i Fa’amasino ia Tologata Tafaoimalo Leilani Tuala-Warren e tuli e Korama i le to’ese ona o le ogaoga o nei soligatulafono na ia fa’atino i lenei alualutoto e na’o le 8 tausaga le matua.


Marieta H Ilalio