(OFISA SOOUPU) – Ua i ai nei le fuafuaga a le Malo e siitia le falema’i faamama toto o i ai nei i se nofoaga fou, ona o loo faatuputupulaia pea le mamalu o le atunuu ua aafia i le faama’i lenei o le fatuga’o a ua le gafatia e le fale o loo i ai nei galuega faatino mo i latou ua aafia i lea gasegase.
Na saunoa ai le Palemia, Afioga Tuilaepa Dr. Sailele Malielegaoi i lenei fuafuaga a le Malo e faapea; “Ua le lava le mea la e faatino ai ia galuega, ua toatele tele. O le aofai o tagata la e faamama toto i le taimi lenei e 124, manatua foi na o le to’a 3 lea na tatou amata ai. O le to’a 3 lena, e 3 i le 4 miliona tala Niu Sila na alu ai ia Niu Sila i le taimi lena, ma ua le toe mafai foi ona toe omai ua nofonofo mau ai a.”
“Manatua e faatolu ona faamama lou toto i le vaiaso, e misi loa ia se faaamamaaga ia o lou aso faamasino lena. Lea la sa tele le tupe a tatou na alu ai, ia lea la na tatou sailiili manū ai lea, mafai ai loa ona maua le auala e tau feololo le tau e faatū ai ia le falemai lea faamama toto.”
“E le’o se nofoaga foi lele faapea e fou, a’o nofoaga ia e i gãuta, manatua o lea ua fou le falemai, a’o la la e faula’i ai isi potu i le itu lea e i uta, o lona uiga la o lea o le a aga’i atu i ai latou.”
“Na matou feiloai nei i le tolu vaiaso talu ai ma le Pule o le NHS ma le Pulega, sa ou fesili la i ai poo le a le tulaga o le tatou fatuga’o. Fai mai o la e tau tapena ese isi mea ia ona o atu loa lea o latou ona ua toatele, o lona uiga la ua le lava le fale lea e i tai a’o lea foi la laa faaoga ma le isi fale tele lea e i uta e faatatau la mo tatou tagata.”
Na ia saunoa faamalamalama foi i nisi o mafuaaga e mafua ai lenei ma’i e faapea; “E manatua foi o le faamama toto, e mafua ona faamama lou toto ona o le tulaga foi lele ua leva ona lavea oe i le toto maualuga ma le suka ae leai sau mea o faia i ai, leai se togafitiga. O le mafuaaga lena o lea e oti ai ia lou fatuga’o.”
“E i ai le tausaga na ou fesili ai i le isi fomai; O le a le mafuaaga e afaina ai le fatuga’o? Ae fai mai ia le fomai; e mafua ona e lavea i le fatuga’o ma faamama lou toto ona ua umi a ona e toto maualuga ae leai se taumafaiga o faia i ai. O’u fai atu loa lea; O le a la le taumafaiga e fai i lena mea? O lou alu e aumai au fualaau e tuutuu ai i lalo le maualuga o lou toto.”
“Ia e manatua foi e ala ona e maua i le toto maualuga, ona ua mafiafia mo ala toto i lou ai tele, o lou ai i meaai gãoa ia aemaise a lou ai fuamoa, auã o le tasi lena mea e oso ai i luga lou cholesterol.”
“Ae ala la ona e lavea i le mea lea o le toto maualuga, ua mafiafia ia totonu o ala toto i le ga’o, a’o lea la e taumafai le fatu e pamu atu foi lele le toto i itutono uma, ua tau le pasi le toto ua puni, ia ona atili ai a lea ona taumafai le fatu e pamu ia ma oso ai a i lugã ia lou toto maualuga, o lona uiga la ua tigaina le fatu i lou ai tele, e tau pamu le toto i vaega uma o le tino, e lavea ai loa i le mea lea o le fatuga’o, ua mamai ou fatuga’o ia ona ave lea e faamama ia lou toto.”
“Ia a e fesili mai la poo a isi mea, o le mea lea o le popole, tasi lena mea e oso ai lou toto maualuga, o le popole i le tele o faalavelave. Faalavelave a le aiga o lou toalua ae leai ni mea e fai a’i. Ia pei la o le tulaga la lena faaopoopo mai o mea na oo loa ina e lavea loa e leai a ma se isi togafiti.”
E le gata i lea na ia saunoa foi i le tulaga e tatau ona tausisi i ai le mamalu o le atunuu ina ia aua nei maua i lenei ma’i; “A’o lea la ua e matau mai e 124 lea e togafiti nei o latou fatuga’o, ae 300 le vaega lea e i le lisi foi lele o lea e taumafai le tatou falemai e tau togafiti ina ia toe tuu tuu atu i tua le aso e amata ai. Ae pau a la le mea e tuu tuu ai i tua o le ‘ai ia taumafataga tatau, tau aveese ai mo le mea o le ga’o i le tino.”
“Lea la ua ou fai atu e 300 le vaega lea ua lavea i le mea lena, i le taimi nei foi lele o lea e faatalitali, o la la e taumafai le falemai; ‘ai taumafa tatau.
“O le a la taumafa tatau? Toaga e ai au esi, ia esi le taeao, esi le aoauli, esi le afiafi, oo i le isi aso esi le taeao, esi le aoauli, esi le afiafi. A e fia ola umi, ia esi a i le Aso Gafua e tau i le Aso Sa, aua e te toe tago i se ‘ia, aua e te toe tago i se isi mea ae nao esi loaloa, ae sili atu ona e manuia pe a alu faatasi ma fatu esi. A e tago la i fatu esi pei e tau feū foi lele le mea, ia ua lava la sina au lima fatu esi.”
