E solitulafono le faaiuga a le Falefitu ma le Aiga Tauaana, ma o le a tapena se tusi e faamanino ai ala o le tulafono, ma afai e teena e le afioaga o Falelatai, o le a oo loa le mataupu i le tulafono.
O le saunoaga lea a le Komesina o Faigapalota le afioga ia Tuiafelolo Toleafoa John Stanley, ina ua fesiligia sona finagalo e tusa o le faaiuga a le Falefitu ma le aiga Tau Aana, ua teena ai soo se vaega faaupufai ona afea Falelatai mo a latou faalauiloa, sei vagana ai le HRPP ona ua tasi le finagalo o le Falefitu mo le latou sui tauva.
Saunoa Tuiafelolo, “O le Tulafono o Faigapalota 2019 i lona vaega 153(a) e solitulafono soo se tagata na te faalavelaveina galuega a le Ofisa o le Komisi o Faigapalota, poo le faatinoga o se galuega e aofia ai ma le faamalosia o le tulafono..”
“O le tali puupuu lava, e solitulafono le faaiuga a le afioaga, le Falefitu ma le Aiga Tauaana.”
Na mua’i faailoa lenei mataupu i se saunoaga a le afioga i le Palemia Tausi le Taitai o le Samoa Ua Potopoto – o le Aso 22 Iulai na tusi atu ai Alii ma Faipule o Falelatai.
Saunoa le Sa’o Faapito ia Fiame Naomi Matāafa, o le auga o le tusi na tuuina atu – e teena ai soo se vaega faaupufai ona afea le afioaga o Falelatai, mai lava i Siufaga seia oo atu i Matautu. E le taliaina ni faalauiloa, ma e oo foi i laupapa faailoilo a sui tauva, ua tapu foi mai le afioaga o Falelatai.
O se tulaga na fesiligia ai e le Taitai o le Malo Tausi lea faaiuga ma talitonu ai, ua aafia aiā saoloto o tagata e faatino ai lana palota, ma aafia ai fo’i sui tauva faapea vaega faaupufai o loo tapena mo a latou faalauiloa, auā le filifiliga saoloto a le atunuu.
Sa tusi loa Fiame i le Komesina o Faigapalota mo sona finagalo faaalia.
O le Itumalo o Falelatai ma Samatau, e toatolu tamalii ua mae’a ona resitalaina ma le faamoemoe e tauva mo le faigapalota i le Aso 29 Aukuso.
O le afioga ia Lupematasila Galumalemana Tologatā Tile Le’ia, sui o le HRPP, Telei’ai Nanai Christian Ausage, sui o le FAST, ma Faalava’au Fasitau Ula, sui o le Samoa ua Potopoto.
Saunoa Tuiafelolo, “Ua tapena le tusi e tuuina atu i le Falefitu ma le Aiga Tauaana e faailoa ai ala o le tulafono.”
“Afai e teena o le a oo loa le mataupu i le Faamasinoga.”
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
