Faigata ona faagalo e le aufaigaluega a Lynn le latou mafutaga ma lo latou pule

0
5355

E faigata tele ona faagalo e le aufaigaluega a le supamaketi o Lynn le latou mafutaga ma le tina pule.

O lagona ia na faasoa mai ai ma loimata nisi o le aufaigaluega ua tele tausaga o latou mafuta ma le tina faipisini o Mata’ia Lynn Netzler.

O Moa Tupuola, 50 tausaga, lea e tau atu iai i le pito i luma o le faleoloa, ae maise le mamalu o le atunuu e fia maua pepa lotto ma le ponesi. Ae o Faatuai Bob, 50 foi, ua loa tausaga o maitauina pea e Cashier i le supamaketi a Lynn.

Mai le tatala o le supamaketi i le 6 i le taeao, e oo atu lava i itula e tapunia ai, e maitauina pea le iai o Moa ma Faatuai, e oo foi i aso malolo ma Aso Sa, ua la faamuamua lava le galuega, e tali atu ai i le alofa o Mataia Lynn.

Saunoa le tinā ia Moa, o le 18 o ona tausaga ae faigaluega loa ia Lynn. O le tausaga 1990 na ma’ea ai Lana vasega 12 i Leulumoega Fou College, ae amata faigaluega ai loa ia Lynn i le 1991.

“Ua 31 tausaga o o’u faigaluega ia Lynn.. ua loa le ma mafutaga..

“O se tina alofa, mai lou olaga atoa ina ua fai lo’u aiga, ua toavalu lau fanau, o si nei lava loomatua na faa’a’oogaina..

“O le atinaeina o lo’u aiga, o Lynn lava..

“Ua faatau lo’u fanua, ua uma ona totogi, ua fai lou fale, ua fai la’u lafu manu, o lenei lava tina..

“Ou te molimau atu o se tina alofa. Ana ou iloa e le alofa ua leva na ou alu ese, ma sue se isi galuega, peitai, o le mafuaaga lena ua umi ai le ma mafutaga, ona o le alofa o lenei tinā ia te a’u ma lo’u aiga.”

“O faalavelave faaleaiga, o pili o la’u fanau aoga, soo se mea, ou te sau lava loan ia Lynn, ma o le taimi lava lena e maua ai. E le mafai ona tuu e le loomatua se mea.”

O le maualuga o le tupe ua ou aitalafu ai ia Lynn, e $5000 tala, ae soo se aitalafu e le uma na totogi, pe afa le aitalafu ua totogi, pe lei afa foi, ae faapea mai lava le loomatua e taatia loa na mea, ua faamagalo aua toe totogiina se mea.”

O le mea’alofa mulimuli lava na aumai e Lynn ia te au e $3000, o lou aso fanau, na ia aumai ai le seleni e faameaalofa e faatau ai nisi apa o lo’u fale i Vaitele.”

E le galo ona e alofa, ua mautu lou fale, lou fanua, aoga lau fanau, leai lava se isi ua mautu ai ma manuia lou aiga o Lynn le faapogai.”

O le maligi o loimata o le tina ia Moa ma faasoa mai e le mafai ona galo lenei tina ma lona alofa.

“Taimi uma e talanoa mai ai, e toaga faigaluega, a uma atu oe a ua mautu le lumanai o lau fanau aua nei faalo’lo, ia uma atu oe ae sosoo mai se isi o lou aiga.”

Sa faapena foi se molimau a le tinã ia Faatuai Bob, 50 tausaga mai Lepa ma Papaloloa.

Saunoa Faatuai, o le 19 o ona tausaga na amata faigaluega ai ia Lynn. O se tina alofa, o se tina e ote ona e le manao lava e faaletonu se mea.

“E tutusa uma ia te ia tagata uma, pe masani, pe le masani foi, ae afai e te sau i se mea e te manao ai, poo se tupe e faa’aooga ai lau fanau, e le mafai ona faapea atu le loomatua e leai se mea.. e avatu lava, ua matou vaai iai, i lona alofa,”

“E le mafai e upu ona faamatala le alofa o Lynn ia te a’u ma lou aiga, o le a se mea ou te sulu mai ai, e maua atu lava, faigata ona faagalo, talofa i le olo sa matou malu ai, pei o ia upu.”

O lagona ia na faasoa mai ai ma loimata, nisi ua leva tausaga o galulue ma mafuta ma le tina ia Lynn.

O le aso Tofi i le itula e 6 i le afiafi lona sauniga faaleaiga (family service).

Ae o le 9 i le taeao o le Aso Faraile 16, lona toe sauniga paia i le malumalu Ekalesia Katoliko i Mulivai.