Ua faailoa le faanoanoaga o le alii avepasi 39 tausaga mai Manono ia Mulipola Vasa Mulipola i le tulaga ua iai nei tupe maua i lana pasi talu nei ona toe tatala ma fa’ataga na o le 20 tagata e malaga ai.
O lea ua faatagaina le toe feoai o pasi, ae tusa ai ma le faasalalauga a le Malo, e na o le 20 tagata e faatagaina. O pasi uma i Samoa o se auaunaga e faatinoina e pisinisi tumaoti. O le faamama avega a le LTA o loo faamautu mai ai le fesoasoani mo pasi o loo aafia i le COVID-19.
O Mulipola o se tamā ua silia i le 15 tausaga o galue o se avepasi, ua fai le aiga ma e toatolu lana fanau o lo’o tausi.
Na ia faailoa e lē faataumatatao i le finagalo o le Malo, peitai o ia le isi tagata fememea’i ona o le tele o fuafuaga sa masani ona faataunu’uina i seleni sa maua mai i le pasi, ae ua le toe maua lea tulaga i le taimi nei.
O le pasese e agai mai ai mai i Manono i Apia e $5 a le tagata e toatasi…”A faapea o tagata uma e omai mai Manono i Apia, lona uiga la e maua le $100 i le malaga e tasi, ia ae e le o tagata uma e omai i Apia nei. O le kiso e utu i le malaga e tasi e i le va o le $60 ma le $70 tala – a fua la iai, matua’i gau lava.”
“Ia te a’u lava ia ona o lenei taimi o le mativa, o le a lava le seleni e maua pe polofiti pe gau ia e fealua’i lava taumafai ia maua se tupe, o lo’u aso muamua lava na’o le $70 la’u tupe mama faatusa atu i le $400 i le $500 i le aso a’o le’i tapunia le atunuu.”
O Mulipola o loo galue i le la pisinisi pasi ma lona uso o le Beyond The Blue. Sa ia faailoa o lona fememea’i ona o lea e tatau foi ona totogi le pasiina o taavale.
O le isi itu faigata, o tupe ia sa maua sa faamoemoe e pasi ai le taavale, o le taimi nei tusa lava pe iai le faamama avega i masina ia ua tu’usaunoaina ai le lesitala mo taavale, ia ae a fua atu i le tupe lea e maua i le taimi nei, o manaoga o le pasi, o lo’u totogi – e le taitai ona ausia le $1445.00 lea e pasi ai le taavale pe a oo mai le taimi e due ai.
O le faasalauga a le LTA mo pasi ua maea ona totogi le resitala mo le pasiga o Mati 2020, e lē toe iai se tupe e totogi mo le toe faafouina o le resitala mo pasiga o Iuni, Setema ma Tesema 2020, ae afai e lei totogia Mati, o lona uiga e leai se totogi mo Mati, Iuni ma Setema.
Na faailoa e Muipola, o ana tupe e masani ona maua i le vaiaso e lata i le $3000 ae o lona totogi sa ia maua i le vaiaso pe a lelei lava, e $550 tala. O lena tupe lea ua le toe maua nei mo lona aiga, e le o iloa fo’i la i le taimi nei, pe fia sona totogi o le a maua i lenei vaiaso”.
O Andy Setoa le pule sili o le Trinity Transport ma e valu ana pasi ae o le taimi nei e na o le lua o loo mafai ona galueina.
“Makua gau a o le aso e tasi na’o le $60 le tupe mama e maua, na pau le vaega lea o loo sikuea o pamu penisini aua a maua le tupe a le pasi e sasaa uma lava i le kiso (diesel);
“Ua ala lava ona feoai a’u pasi e lua o lo’u manatu i nai tagata nei faapea mai ua ou le ano atu ae o lea ua tatala mai le sa, ae o le taimi nei ia e lē o lelei le tulaga lea e iai mo tupe maua”
“E feoloolo la a’u e moi a o Satapuala le mamao o le alu a a’u pasi, fua la iai i nai pasi mai le mamao i tuā e le laititi le gau”
[starbox]
