Faiga Fa’asolitulafono ma Faiga Sēsē a nisi sa faigaluega muamua i lenei Kamupani.

0
63

E tu’uina atu e le Samoa Sports Lotto lenei Fa’aaliga Fa’alaua’itele ina ia fa’asa’o ma fa’amanino ai nisi o fa’amatalaga sēsē ma le lē sa’o e uiga i le mataupu ua taua i luga mo le silafia e ana pa’aga ta’aalo.

I le maea ai o le suesuega fa’alotoifale a le Samoa Sports Lotto, ua fa’apea fo’i ona fa’aulu atu le tagi a lenei kamupani i le Matagluega o Leoleo mo le faia o moliaga fa’asolitulafono mo nisi sa faigaluega muamua i lenei kamupani mo faiga taufa’asēsē ma le lē sa’o atoa ai ma le gaoi a’o avea ma tagata faigaluega i le Samoa Sports Lotto fa’apea pa’aga ta’aalo a le TMS (Ausetalia)

O latou ua fa’apea ona fa’ailoa ma tu’uina atu suafa i le Matagaluega o Leoleo mo nisi suesuega talafeagai ua molia aloaia nei e le Matagaluega o Leoleo mo le gaoi a’o avea ma tagata faigaluega fa’apea ai ma nisi moliaga fa’asolitulafono.

O latou ua fa’apea ona molia, e aofia ma le sa fa’atinoina faiga e ta’u leagaina ai le igoa o le Samoa Sports Lotto. Ua fa’apea foi ona faia se tagi e agai i lenei tagata fa’apea nisi o lona aiga mo le tau fa’asēsē fa’apea le fa’aleagaina ma le ta’u leagaina o le igoa o le kamupani atoa ai ma le fa’amata’uina o alii ofisa atoa ai ma mea totino a le Samoa Sports Lotto.

Ua lē o gatasi suesuega I lenei mataupu ona o le lē sa’o o lipoti ma fa’amatalaga a nisi o fale fa’asalalau ma upega tafa’ilagi ua faia e aunoa ma le sailia o fa’amataga sa’o ma le moni, ma ua fa’apea ona lima ta’ita’i sēsēina ai le mamalu o le atunu’u ma ua fa’apea ona a’afia ai le sa’o ma le moni o le fa’atinoina e le Samoa Sports Lotto faapea le TMS o a latou ta’aloga.

E lē gata ua tele ai le fa’aluafesasi, ae ua fa’apea fo’i ona se’e ese mai le sa’o o lenei mataupu o lo’o matuā a’afia ai le Samoa Sports Lotto fa’apea lana paaga a le TMS ona o nei faiga fa’asolitulafono ma le lē fa’amaoni sa faia e nisi sa faigaluega muamua a’o avea ma tagata faigaluega (teller/operator & sales). Ona o nei faiga lē sa’o ua fa’apea ai ona sailia e le kamupani fa’apea le TMS auala uma i le malosiaga o le Tulafono e molia ai tagata po’o kamupani  ua fa’apea ona latou fa’aleagaina le igoa ma le ta’uleleia o le Kamupani fa’apea ta’aloga a le TMS.

Ua maea ona logoina pa’aga ta’aalo a le TMS e uiga i nei suesuega ma le alafua ua fa’apea ona uia ina ia fa’amalieina i latou e tusa ai ma aiaiga ma la’asaga o lo’o fa’apea ona latou ta’aalo ai i taaloga a le TMS e tusa ai ma le fa’aaliga aloaia ma fa’amatalaga o loo lomia ma fa’apipi’ina i luma o le ofisa autu faapea lālā. E fa’afetaia le mamalu o pa’aga ta’aalo a le TMS mo le lagolagina o le su’esu’ega sa fa’atinoina, i lo outou fa’apalepale ma le onosa’ia o lenei mataupu atoa ai ma la outou lagolago ma le fa’atuatuaina o le auaunaga a le TMS fa’apea le Samoa Sports Lotto, fa’apea ai le fa’atumauina o le maualuga o pepa fa’atau a le TMS i le 4 vaiaso talu ai, a’o feagai le ofisa ma nei to’atuga.

O lenei mataupu ua fa’apea ona i luma o le Fa’amasinoga mo le su’esu’eina, ma o le fa’aliga aloaia mulimuli fo’i lenei a le Samoa Sports Lotto e uiga i lenei mataupu. E manatu ua avea lenei fa’aaliga fa’alaua’itele ua fa’asa’o ma fa’amanino ai finagalo o pa’aga ta’aalo fa’apea ma le mamalu o le atunu’u e uiga i lenei mataupu.

Fa’afetai

PULEGA

SAMOA SPORTS LOTTO.