“O le taimi lenei i le mea lea ou te nofo ai o a’u ua ou faalogoina lo’u ma’i, ma o le taimi lenei lau afioga i le alii faamasino o le faasalaga lea e fai i o, seitulou lava le paia, pei le faiga o a’u o le faiga o se meaola”
O upu ia a le alii o Aniseko Vaelei, na fai atu i le alii faamasino ia Leiataualesa Daryl Clarke ina ua maea ona tuuina mai le aso e toe valaau ai lana mataupu i le faamasinoga, seia maea faamautu mai moliaga a leoleo.
O Aniseko Vaelei lea sa sosola ma Chong Nee ma la osofaia ai le faleoloa o le One Shop i Vailoa ma toesea ai $60 afe tala. Sa toe maua mai e leoloe Aniseko ma toe faafoi i le falepuipui petai sa la toe sosola foi i tua mai Tanumalala ma Lauitiiti Tualima.
Sa faailoa mai e le tamaitai loia o le itu a leoleo o le moliaga o le umia ai o fualaau faasaina lea o loo tulai ai lea alii i le taeao ananafi.
O le aso 2 o Tesema lea ua tuuina atu iai le mataupu a Aniseko e toe valaauina, peitai e faate’ia le faamasinoga i le talosaga a Aniseko sa tuuina mai.
Sa faapea mai o ia ua faamaimai, ma o loo faaoolima ia te ia le Vaega o Falepuipui. E le lava meaai, ma leaga mea o loo moe ai, ma le tele o aso e le taele ai.
“Lau afioga i le alii faamasino, kele kaimi e fasi ai a’u, ae a avaku le meaai, si kamai fasimoa lava, ma e kai 5 aso e le kaele, leai se aluga leai se ieafu, moe i le malulu, ma faasa ga koe o aku lou aiga e vaai a’u”
Sa faailoa iai e le alii faamasino e faapea…”Aniseko afai o na e fia fai sau tagi e iai lava vaega o le ofisa o le matagaluega o le falepuipui e agai iai lau tagi, afai o na e fasi oe i Tanumalala e iai lou aia tatau e fai ai sau tagi i le ofisa o leoleo, a ē manaomia foi le fia alu i le falema’i pe afai o lea ete ma’i, faafesoota’i le ofisa ma faailoa iai.”
O loo tumau pea le nofo taofia ai o lea alii i Tanumalala, aemaise ai o le tele o moliaga faasaga i lea alii mo le tele o isi soligatulafono.
(5)
