Faaulu se Tagi a Levi Saleimoa i le Ofisa o Sulufaiga

O se tino i tupe e $2000 sa faameaalofa e Maulolo e tali ai le galuega fita a Leoleo o loo fesiligia e Levi Saleimoa.

0
744

O loo suesueina e le Ofisa o le Komesina o Sulufaiga se faasea e faasaga i le Sui faipule o Sagaga 2, faapea le Matagaluega o Leoleo.

I se faatalanoaga ma se sui o le Ofisa o Sulufaiga, sa faamautinoa ai sa faaoo atu e sui o le afioaga o Levi Saleimoa o se tagi e faasaga i le tofa iā Maulolo Tavita Amosa, ina ua ia tuuina atu se tino i tupe e $2000 tala i alii Malu o le Malo, e talamasinei ai le latou galuega sa fita ai ao faatino galuega a le afioaga o Afega.

O le fonotaga a le afioaga o Levi Saleimoa na faailoa ai e le tofa iæ Umuleta’inafi Pati Mua’au o le sui o le afioaga le tapena ai lea o se tusi poo se tagi a le afioaga e faasaga i gaigoiga sa pueina i se ata video.

O le ata video ua salalau foi i luga o fesootaiga tele vavave, o loo iloa atu ai le tuuina atu o se seleni mo alii Malu o le Malo.

Sa faatalanoa le tofa iā Maulolo i lena taimi ma fesiligia ai le afioga i le faipule i sona finagalo, peitai, na saunoa Maulolo Tavita..

“E le o se isi lava itu na mafua ai ona faatino, o le tofa aiga Sa Gauifaleai o le ava fatafata ma le manatu alofa i Malu o le Malo sa fa’aaugagase ao faatino le galuega a le afioaga o Afega.

 

O se vaaiga i le galuega tele sa faatinoina i le suaina o le auala galue a Afega. Sa auai atu ai alii ma tamaitai Malu o le Malo mo le silia ma le 3 vaiaso.

Peitai, e le tusa ma le finagalo o le afioaga o Levi Saleimoa lea itu.

Tā’ua e le fetalaiga ia Umu, o se gaigoiga e le tusa ma le tulafono.

“Ua togi tupe e Afega le Matagaluega o Leoleo, o le mafuaaga lea na tulai ai lava leoleo mo le afioaga o Afega..”

I se uluai feiloaiga a afioaga e lua i luma o le Ofisa Sili o le Matagaluega o Famasinoga iā Papalii John Afele faapea ma le Komesina o Leoleo iā Auapaau Logoitino Filipo, sa tā’ua ai e se tasi o tamā marua o le afioaga o Levi, le susuga ia Tanoa Misi Mua’au, ua pagatia Levi i le mataupu o loo vevesi ai nei ona ua togitupe e Afega leoleo.

O le saunoaga a Tanoa Misi sa teena malosi e le Komesina o Leoleo.

O le suaina o le auala galue a le afioaga o Afega sa faaauauina ina ua maea ona tuuina mai se faaiuga a le Faamasinoga o Fanua ma Suafa, o fanua o loo tulai mai ai fe’eseeseaiga, o fanua e patino tonu ia Fata ma Maulolo.

“E mulimulitai le Faamasinoga i le faaiuga o le 1963, o eleele ei tua atu o le Faatafafa a Fata ma Maulolo, o fanua lava o Fata ma Maulolo e pulea e Alii ma Faipule o Afega.”

Peitai sa tulai foi se tasi o alii loia mai Levi Saleimoa, ma faapea mai, e ese foi lo latou mau ona e talitonu i latou, o fanua o Levi ua loa tausaga o galueina e latou tuaa.

E le o mailoa mai i le taimi nei poo afea e tuuina mai ai se tali a le Ofisa o Sulufaiga i lenei mataupu.

Vacancy