Faa-Samoa

Faagasolo i le Faamasinoga le Tagi a lē sa avea ma Taitaifono faapea le Komiti Faatonu o le EPC Faasaga i le Regulator

July 5, 2023

4367

O loo faagasolo i le Faamasinoga Maualuga le mataupu i se tagi a lē sa avea ma Taitaifono ma Sui o le Komiti Faatonu o le Malosiaga Faaeletise le EPC, e faasaga i le pule faatonu o le Regulator faapea se tasi o Nusipepa i Samoa.

O loo maua i le SSAB faapea le Online Store www.ssab.ws

O lenei mataupu o loo faagasolo nei i luma o le Faamasinoga Maualuga, e tusa ai ma se tagi a le afioga ia Fia’ailetoa Pepe Christian Fruean ma isi Sui o le Komiti Faatonu sa latou auai ai.

O le pogai o le tagi ua tuuina atu i luma o le Faamasinoga, o nisi o tuuaiga sa lomia i se tusi a lē o loo Pule Faatonu (Regulator), le afioga ia Lematua Gise Fuatai Purcell.

O lea tusi sa tuuina atu i le Minisita o Fesootaiga, ma se fautuaga a Gisa, ua tatau ona toe iloilo le Komiti Faatonu a le EPC, ma fai se faaiuga e sui ai i latou. Sa iai ma ni tuuaiga e faapea e lē o mulimulitai i latou i le Tulafono Tau Eletise, Electricity Act.

O le lona lua o itu o loo faasaga iai le tagi a Fia’ailetoa Pepe ma ē sa avea ma Komiti Faatonu o le EPC – o le nusipepa o le Samoa Obsever, ina ua latou lomiaina le tusi a le Regulator.

O le faaupuga o loo tetee iai le mataupu ua i luma nei o le Faamasinoga, ua tatau ona faamālōlō le taitaifono ma lana komiti faafoe, ona e lē agavaa ma lē amiotonu i le faatinoga o a latou tiute.

O le mau a le tagi ua i luma nei o le faamasinoga, o le faasalalauina o lenei tusi ua aafia tele ai le tauleleiina o le Taitaifono ma le Mamalu o le Komiti Faatonu lea e aofia ai Nu’ulopa Pereira Hill, Vaai Simon Potoi, Fuimaono Beth Onesemo ma Tuautu Ross Peters.

Ina ua tulai mai lenei mataupu ma agiga i itulau o nusipepa faapea news o upega tafailagi, sa saunoa mai ai Fia’ailetoa Pepe e ala i le latou loia, e alagatatau ona faatoese atu le Regulator i le Komiti Faatonu e tusa ai ma tuuaiga o loo tusia i lana tusi ua faalauiloa atu i tua ma faasalalauina.

Peitai e lei finagalo le Regulator e faataunuuina lea tulaga, lea ua oo atu ai le mataupu e pei ona tolaulauina i le Faamasinoga Maualuga i le vaiaso nei.

I le taimi nei o loo fetalia’i itu o le mataupu e ala atu i alii ma tamaitai loia. Ua toe tolopo ai lenei mataupu i le Aso 17 o Iulai, e toe valaauina ai ma tuuina mai ai foi nisi o tali a itu o loo tuuaia, ae lei tuuina mai se aso mautu e iloiloina ai.