Ua leai nei se faalavelave e taofia ai le afoga ia Tagaloa Leilua Tupou Afa, e tamoe i le faigapalota tele o loo loma nei, ina ua toe ave i rua se lu’i faaletulafono sa faasaga ia te ia.
Ina ua valaauina le mataupu i luma o le Faamasinoga i le vaiaso nei, sa toe faaui i tua le tagi a le afioga i le Minisita Tausi o le Matagaluega o le Soifua Maloloina, ia Valasi Luapitofanua Toomaga Tafito Selesele o se sui foi o le vaega faaupufai o le Samoa ua Potopoto.
Na tula’i le afioga i le tamaitai loia ia Fuimaono Sarona Ponifasio o loo tulai mo le Minisita ma faailoa se finagalo o Valasi e toe faaui mai i tua le tagi a faasaga ia Tagaloa.
Na talia e le afioga i le Faamasino Sinia ia Vui Clarence Nelson faapea le afioga ia Leiataualesa Daryl Clarke le talosaga.
I fafo mai o le potu faamasino na saunoa ai le tamaitai loia ia Fuimaono, “O le tofā ma le tuualalo a suafa ma se faautaga momoli a le itumalo e seu i fanua – lea ua toe faaui ai i tua le tagi.”
Na saunoa fo’i le afioga ia Tagaloa Afa e faafetaia le tofa ua a’e i le Minisita Tausi, i le faamuamua o le Itumalo, ma ia aua ne’i faatasina le mamalu o le afioaga ae maise le itumalo i luma o le faamasinoga.
O loo totoe mai pea ni mataupu se fa (4) o lui faaletulafono e fofogaina le Aso Faraile nei 15 Aukuso 2025.
O na mataupu e aofia ai le mataupu mai le itumalo o Gagaifomauga 3 – le Susuga i le Laaulialemalietoa Leuatea Polataivao Fosi Schmidt, sa ia fesiligia ai le faatinoina o monotaga a matai mai Aopo sa latou faamaoniaina le afioga ia Faaulusau Rosa Lavea, le sui faaolioli o le HRPP.
O le isi mataupu o le itumalo o Gagaaemauga 1, o le lu’i faaletulafono a le afioga ia Tuala Tevaga Iosefo Ponifasio, sui a le SUP, e faasaga i le tofā ia Vaaaoao Salu Alofipo, o le failautusi a le FAST.
Ae mo le itumalo o Faleala 2, o le Aso Faraile nei foi e fofogaina ai le faaiuga o le lu’i a le afioga ia Leatinuu Faumuina Wayne Sooialo o le SUP, e faasaga ia Muaaufaalele Mary Faafouina Taeu, o le sui o le FAST. Faapea fo’i ma le lu’i a Leatinuu e faasaga i le sui o le HRPP le afioga ia Ulugia Elon Betham. O loo fesiligia e Leatinuu le faia o monotaga faa le Ekalesia ma le Nuu o sui faaolioli uma e lua.
E lua mataupu tau faigapalota ua maea ona fofogaina faaiuga – e aofia ai le mataupu a le itumalo o Faleata 3, o le lui a le afioga ia Paloa James Stowers o le FAST sa agai i le tofā ia Lealailepule Rimoni Aiafi, sui o le HRPP.
Ua maea foi ona tuuina mai le faaiuga o le mataupu a Faleata 4, i le va o Ale Vena Ale ma Pepe Christian Fruean.
Ona o ia mataupu sa fesiligis ai le nofo mau o Sui Tauva i Samoa nei, sa vave lava ona tuuina mai faaiuga a le Faamasinoga Maualuga e faaleaogaina ai lu’i a Paloa ma le tofā ia Ale, ma poloaina ai le totogi o ta’i $2,000 agai atu i itu tagi.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
