Faauau Suesuega a Leoleo i le maua atu o Fualaau Faasaina i Tanumalala

0
851
Tanumalala Prison Room 2, Prison opening June 2019. Photo: Samoa Global News.

O loo faaauau pea suesuega a le Matagaluega o Leoleo i se mataupu o loo faamalolo ai se tagata faigaluega o le falepuipui, ae sei faagasolo suesuega i tuuaiga sa ia tuuina atu telefoni i pagota, ae maise o le sueina pe faapefea ona oo atu marijuana i totonu o le toese.

Ua faamaonia mai e le Sui Komesina o le Matagaluega o Leoleo, Papalii Monalisa Tiai-Keti le tulai mai o nei faafitauli i le nofoaga i Tanumalala, lea sa faamalolo ai se alii faigaluega o le toese.

Saunoa Papalii, o le Alii o loo faamalolo nei, o loo tuuaia lona tuuina atu o le telefoni i nisi o pagota o loo tuli a latou faasalaga.

“O se tulaga e le talafeagai ma le tulafono, manatua soo se tasi lava o loo tuli sona faasalaga, e le mafai ona toe fa’aogaina se telefoni ma nisi lava fesootaiga, peitai, ua maitauina lea tagata ofisa o loo ia solia tulafono o le toese..”

O se tulaga na lipoti mai lava e le aufaigaluega i Tanumalala, e pei ona saunoa Monalisa.

Saunoa Papalii, o suesuega o loo faagasolo nei, pe lē o iai nisi o le aufaigaluega o loo aafia ai i nei faiga faasolitulafono.

Saunoa foi le Sui Komesina, o loo ua iai se molimau faamoemoeina i totonu o le nofoaga, ua faapea mai e lē na’o telefoni, ae o loo maitauina foi le feavea’i o fualaau faasaina i totonu o le nofoaga.

 

O Tesema o le tausaga na sei mavae atu nei, na tulai ai se alii o loo tuli lona faasalaga i totonu le toese, e tali lona moliaga o le umia lea o fualaau faasaina o le mariuana.

O se tulaga na fesiligia e le Alii Faamasino ia Fepuleai Ameperosa Roma, le toe molia o lenei alii, ao loo tuli lona faasalaga.

Sa fesiligia e Fepuleai pe faapefea ona sao atu fualaau faasaina i totonu o le nofoaga i Tanumalala.