Ua molia e leoleo se tagata sa ia faaaogaina le tusi siaki a le kamupani e aveese mai ai se tinoitupe e silia ma le $500,000 talā.
O Cruz Misipele, 22 tausaga o Lepea ma Vailoa Palauli, o loo molia e leoleo i moliaga e 52 o le gaoi.
O lenei alii talavou, sa avea ma tagata faigaluega i se tasi o faletalimalo i le taulaga.
I faamaumauga a le itu a leoleo e pei ona fofogaina i luma o le Faamasinoga Maualuga i le vaiaso nei, e 29 moliaga o le faia o auala taufaasese ma le faamoemoe e maua mai ai tupe, 20 moliaga o le aveese o mea totino, lua moliaga o le gaoi ao avea ma tagata faigaluega, ae tasi le moliaga o le taumafai e aveese ma nana faamaumauga.
O le Aso 3 o Ianuari seia oo mai i le Aso 25 o Mati 2024 o loo faamauina sa faatino ai nei soligatulafono.
O loo faamauina foi i pepa o moliaga a le itu a leoleo, na amata i se $300 talā le seleni na aveesea. Ma siisii ai lava lea o le fuainumera seia oo atu lava i le ta’i $7000 talā, ma e eseese uma aso sa faatino ai nei gaioiga faasolitulafono.
Sa tula’i Misipele e aunoa ma se loia (unrepresented). Sa tuu avanoa le Faamasinoga mo se taimi e saili ai se loia e tulai mo lē ua molia.
O le tasi lenei o soligatulafono o loo faatupulaia pea ona aafia ai pisinisi tumaoti, o le gaoi ao avea ma tagata faigaluega.
Ua faatupulaia foi ma moliaga e oo mai i luma o le Faamasinoga. O loo faagasolo fo’i ni mataupu o loo aafia ai nisi o pisinisi e pei o le Bluebird Hardware, faapea foi ma nisi o faletupe.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025














