Ua faatupulaia mataupu tau fualaau faasaina o loo molia mai ai pagota i totonu o le toese i Tanumalala, ma e tatau lava ona faasalalauina mo le silafia e le atunuu.
O le saunoaga lea a le Alii Faamasino ia Fepuleai Ameperosa Roma, e tali atu ai i se talosaga a sē tasi o pagota sa tula’i i luma o le Faamasinoga, ma tuuina atu sana talosaga ina ia taofia le faasalauina o taualumaga o lana mataupu.
Sa tūlai Faasao Peseta, o se tane mai le afioaga o Pu’apu’a Savaii e tali atu i lona umiaina o ni afifi o loo iai ni lālā ma ni fatu mariuana i totonu o le toese. Sa ia saunoa i luma o le Alii Faamasino, ma tuuina atu sana poloaiga, e taofia ai tusitala mai le faasalalauina o lana mataupu.
Ae o le tolaulauina o faamaumauga a le itu a leoleo sa taitaia e le tamaitai loia ia Lupematasila Iliganoa Atoa, o loo tā’ua ai, o le Aso 16 o Ianuari i le tausaga nei, i totonu lava o le toese, sa maua atu ai ni afiafi mariuana se lua ma se pepa iila o loo iai fatu o le laau faasaina.
E 27.1 kalama le mamafa o ni lālā mariuana sa afiafi i se pepa tissue, ae o le isi afifi e 8.28 kalama. Sa maua ai foi ma ni fatu mariuana e 34 o loo afifi i se pepa iila, ma le isi 108 fatu mariuana o loo afifi i se pepa tissue.
E le’i atoa se vaiaso e vā ai, ae toe maua foi i le Aso 22 o Ianuari ni sikaleti mariuana se 191.
“Sa maua atu ao ia faia le galuega o le faatau atu o sikaleti.”
Sa ioeina uma e Faasao Peseta moliaga a le itu a leoleo, ae peitai, sa finagalo le pagota e taofia mai lona suafa ina ia aua nei faasalalauina e le vasega o tusitala.
Sa saunoa manino le afioga ia Fepuleai Ameperosa Roma, “E tatau ona faasalalauina taualumaga o faamasinoga auā le silafia a le atunuu lautele, aemaise, ua faatuputeleina le tulagala lea o le maua o fualaau faasaina i totonu o le toese.”
E le’i mā’ua mai suesuega a leoleo, pe iai se tinoitupe sa maua atu ai, ona o lea sa manino o se fefaatauaiga o mariuana sa fai.
O le Aso 15 Mati o le tausaga nei, e toe fofogainaina ai lenei mataupu, ma momoli mai ai le faasalaga mo lē ua molia.
I le mataupu lava tau fualaau faasaina i totonu o le toese, sa tulai ai foi i le asō se tamā e suafa ia Faofua Koko, 62 tausaga le soifua mai le afioaga o Levi Saleimoa, ina ua maua atu ni pepa mariuana o loo ia ūmia.
E pei ona tolaulauina i luma o le Faamasinoga, o le Aso 20 Ianuari o le tausaga nei i totonu o le toese i Tanumalala, sa ia umia ai ni lau mariuana 3.4 kalama le mamafa, ma le 2.24 kalama le mamafa o mariuana ua maea ona tuuina atu faa sikareti.
O loo ioeina foi e le tamā ia Faofua Koko ona moliaga o le umaiaina o fualaau faasaina. O le Aso 8 o Mati o le tausaga nei o le a tuuina mai ai le faasalaga (sentence) a le Faamasinoga i lea foi tamā ua toe solitulafono ao tuli lona faasalaga.
I lenei lava mataupu, sa tulai ai foi se alii o loo tuli lona faasalaga i Tanumalala ia Tesema 2022, ina ua molia foi lona umiaina o fualaau faasaina.
O loo teena e Sefo Amituanai ona moliaga sa ia umiaina fatu marijuana e 27, faapea ma lala marijuana e 34 e tusa lea ma le 13.48 kalama lona mamafa.
O se tulaga o loo fesiligia ai pea e le Alii Faamasino pe faafefea ona sao atu le tele o fualaau faasaina i totonu o le toese.
O le faaiuga o Ianuari sa faamaonia mai e le Sui Komesina o le Matagaluega o Leoleo, Papalii Monalisa Tiai-Keti le tulai mai o nei faafitauli i le nofoaga i Tanumalala, ma sa faamalolo ai se alii faigaluega i Tanumalala ina ua ia tuuina atu se telefoni feaveai i se tasi o pagota.
Sa tā’ua e Papalii Monalisa i lea taimi, o loo ua iai se molimau faamoemoeina i totonu o le nofoaga, ua faapea mai e lē na’o telefoni, ae o loo maitauina foi le feavea’i o fualaau faasaina i totonu o le nofoaga.
