O loo faatuputupula’ia pea le faafitauli o le pule i le ola i totonu o si o tatou atunuu, ma o totonu o le vaiaso lenei, e toatolu nisi ua aafia ma maliliu ai.
E pei ona saunoa iai le Sui Komesina o Leoleo, Papalii Monalisa Tiai-Keti, o se tamaititi e 11 tausaga, sa maua atu lona tino maliu totonu lava o le latou fale i se tasi o afioaga i Savaii.
Na faaleo se lagona faamaise a le Sui Komesina i le aiga faanoanoa, ona o le toesea ai o se tasi o fanau iti.
Ae peitai, na saunoa foi Papalii i lona lagona faanoanoa tele, ona o lenei lava faafitauli sa tuuina mai ai foi se faamatalaga a le Sui Komesina ia Tesema o le tausaga ua tea nei, ae o lea ua oo lava i le tulaga ua amata ai ona aafia le fanau.
“O le maliu ai o lea tamaititi, e lē faigofie, ma e lē o se tulaga lelei foi, ona o lea ua oo i fanau le lagona lea o le pule o le ola.”
“Atonu o se uluai taimi lea ua aafia ai se alualutoto, aua o le tele lava o faafitauli ma maliu pule i le ola o loo tulai mai o tagata matutua ma ē talavou.”
“Peitai o le tulai mai o lea faalavelave ua tatau ai lava ona mata’itū lelei fanau iti, ma le vaavaiga o lo latou saogalemu aemaise o mafatiaga o loo aafia ma latou lagona.”
O isi maliu pule i le ola i lenei lava vaiaso, sa tā’ua e le Sui Komesina, o ni tinā se toalua. O se tasi o nei tinā sa maliu i le faaiuga o le vaiaso lea, ae o le isi o le amataga o le vaiaso nei.
“O le maliu ai o nei tinā o se tulaga faanoanoa tele foi auā o ni tinā talavou i le va o le 20 – 35 tausaga le soifua. O ni tina e fai aiga; taitoalua ma fanau..”
O le saunoaga a le Sui Komesina, o faafitauli faaleulugalii lea e masalomia i le tulai mai ai o faalavelave na aafia ai tinā uma nei.
O nei maliu e tolu i totonu o le 7 aso sa saunoa Papalii, o lo o faatino ai nei tulaga masani mo taualumaga o Faamasinoga o Maliu (Coroner) i le faatulagaina pe moomia ni taotoga faapitoa (autopsy).
O le tausaga talu ai na eseese ai faamaumauga a le faalapotopotoga tumaoti o le Faataua o le Ola ma fuainumera a le Matagaluega o Leoleo i le aofa’i o i latou sa pule i le ola.
E pei ona faasalalauina e Papalii i le faaiuga o le 2022, sa matauina le siitia o le fainumera o ē sa maliliu i le pule i le ola mai le toa 19 le aofai i le tausaga 2021, i le toa 28 i le tausaga 2022.
Ua toe tuuina mai foi se tuualalo a le matagaluega e tauala mai i le Sui Komesina.
“O le pule i le ola e lē o le tali lea o faafitauli, ae valaau mai i le Matagaluega o loo iai lava foi nisi o le Matagaluega e mafai ona faatalanoa faafitauli ma maua ai se fesoasoani.”
O le Faataua le Ola, latou te faatalatalanoaina ma tuuina atu fesoasoani talafeagai mo nisi o loo tupu ai lagona pule i le ola.
O le numera vili fua e valaau iai o le 800 5433.
Ua tā’ua e se tasi o sui o le Faataua le Ola sa maua atu i le afiafi o le Aso Tofi i le numera lea, o aso uma lava e latou te tali atu ai i nisi e telefoni atu i le latou ofisa – poo se mea o le 3 i le 4 i aso taitasi.
Ae a oo foi i afiafi ma po (after hours) e tali mai ai foi le numera vili fua lea. O le mau a le sui o le Faataua le Ola, e toatele le mamalu o le atunuu e lē faataunuuina lea tulaga, pe a maua atu se avanoa e faatalanoa ai i lalo o le latou auaunaga.
Ae pei ua na o i latou e faataunuu lea tulaga faanoanoa, e lipotia mai i le news, ae leiloa mai le isi toatele o loo faasaoina pe a maua se avanoa e faatalanoa ai.
