Faatulaga le Aso e Suesueina ai le Mataupu o loo Tuuaia ai sē Tasi na fai ma Pule Sili Lagolago o le Matagaluega o Faamasinoga

0
235
Courthouse Mulinuu houses the MJCA offices and corporate division. Photo: Maina Vai, SGN.

O le aso 24 o Iulai o le tausaga nei, o le a suesueina ai mau a le itu a leoleo e faasaga i moliaga a lē sa avea ma pule sili lagolago o le Matagaluega o Faamasinoga.

O Sera Marie Skelton, o loo molia i le moliaga o le lima tago ese ao avea ma tagata faigaluega (theft as servant) ma e silia ma le $300,000 le seleni o loo tuua’ia ai lē sa avea ma pule sili lagolago i le vaega o le Corporate Services.

I taualumaga o le faamasinoga talu ai, o loo manino mai ai le silia i le 80 moliaga sa tuuina mai e le itu a leoleo, lea na molia faatasi ai Skelton ma se tamaitai sa galue i lalo o le auaunaga lautele (corporate services).

O le tamaitai e suafa ia Hanna Euta Fuatavai o lea ua faalauiloa mai e le itu a leoleo, ua toe faaui mai i tua ona moliaga, ae ua sauni Hanna e avea ma molimau a leoleo e faasaga ia Sera Skelton.

O le a fofogaina le mataupu i luma o le tamaitai faamasino ia Niava Mata Tuatagaloa i le Faamasinoga Maualuga. O le Alii loia ia Quentin Sauaga o loo tulai mo le tamaitai o loo tuuaia nei.