Ua toe faatulaga e le Faamasinoga Maualuga le aso e toe fofogaina ai le suesueina o le tagi a lē sa avea ma loia sili e faasaga i le tamaitai Palemia o Samoa.
O le Aso 27 o le masina nei o Mati, e suesueina ai le tagi a le afioga Savalenoa Mareva Betham-Annandale, e faasaga i le tamaitai Palemia le afioga Fiame Naomi Mata’afa.
O Savalenoa Mareva Betham-Annandale sa tofiaina e fai ma loia sili o Samoa ia Iulai 2020. Peitai, o le masina o Setema 2021 sa talosagaina ai e le Palemia le Ao Mamalu o le Malo, e toe aveese mai le tofi loia sili ona o mafuaaga sa tuuina mai e le Palemia i se pepa o faamatalaga mo le atunuu.
Ina ua tuli ese Savalenoa mai le tofi loia sili, sa ia tuuina atu ai loa se tagi i luma o le Faamasinoga Maualuga, ina ia totogi mai le $650k afe tala.
O le mau a Savalenoa, e leai se mafuaaga tatau na tuli ese ai o ia mai le tofiga Loia Sili. Ae o le mau a le Palemia i se pepa o faamatalaga na tuuina mai, ua le toe iai se faatuatuaga a le Malo i le tauaveina e Savalenoa o tiute taua o le Loia Sili.
O le valaauina o lenei mataupu i le masina o Fepuari, sa talosaga ai e Taulapapa Brenda Heather-Latu lea o loo tulai mo le Palemia, ina ia tuuina atu se taimi e tapena ai se tali ona o loo malaga le afioga ia Fiame.
Ina ua toe tolaulauina lenei mataupu i le Aso Gafua, sa tuuina mai ai loa e le Faamasinoga Maualuga le aso 27 o Mati mo le suesueina.
O le Alii loia mai Niu Sila, Dr Rodney Harrison o loo tulai mo Salevanoa Mareva Betham, ae o le tamaitai loia le afioga Taulapapa Brenda Heather-Latu, o loo tulai mo le Palemia.
- Teena se Poloaiga e Taofia ai le Faatinoga o le Galuega a Afega - December 5, 2023
- 177 Moliaga o le Gaoi a o Avea ma Tagata Faigaluega o le National Bank of Samoa - December 4, 2023
- Toe Tolopō i le 2024 le Mataupu a lē sā Gaoi le $1.5 Miliona mai le ANZ Samoa - December 4, 2023
