Tusia: Pesetā Tusiga Taofiga, Press Secretariat. Ua fa’amaonia mai e le afioga i le Palemia, Susuga i le La’aulialemalietoa Leuatea Polāta’ivao Fosi Schmidt, le pāsia e le Kapeneta o le fa’atūina o se Pulega Fou mo Atina’e o Afio’aga [District Development Authority] fa’apitoa lava mo le Polōketi Miliona.
I lea suiga, ua vavae ‘ese ai le Polōketi Miliona mai le fa’amalu o le Matāgaluega o Tinā ma Tama’ita’i, Atina’e o Nu’u ma Agafeso’ota’i, i le naunauta’iga atoa, ina ia ‘aua ne’i numi fa’atasi lea polōketi ma Faiga Fa’avae fitoitonu i le Matāgaluega o Tinā ma Tama’ita’i, Atina’e o Nu’u ma Agafeso’ota’i.
Ua pāsia ai fo’i ma le suia aloā’ia o le igoa o le Matāgaluega o Tinā ma Tama’ita’i, Atina’e o Nu’u ma Agafeso’ota’i i le Matāgaluega o ‘Āiga.
E pei ona saunoa le Palemia i lana polokalame ma le vasega o tusitala, ua silasila loloto le Mālō, ia lē na’o tinā ma tama’ita’i e taula’i i ai fesoasoani a lenei Matāgaluega.
“Ia fa’amapu’e le fa’aaofia uma ai o tamā, ali’i ma fanau, fa’apea ekalesia ma le fa’amalumaluga a le pulega mamalu a ali’i ma faipule.”
Saunoa La’aulialemalietoa; “O se tasi o fa’amuamua a le tatou Mālō mo le atina’e o Itumālō e 51 i le atunu’u, o le galuega e ao ona saga matimati..
“O le agaga o le Mālō ua fa’atūina ai le Pulega Fou lenei mo Atina’e o Afio’aga, ina ia matuā si’itia le fuafuaina [planning], fa’atinoina [implementation] ma le mata’itū [monitoring and evaluation] o tatou galuega uma o lo’o fa’atino mo Fono Fa’avae ma atina’e mo Itumālō.”
Saunoa le Palemia, e $510 Miliona le aofa’i o le vaegātupe ua fa’atatauina mo le Polōketi lenei a le Mālō mo le isi lima tausaga.
“E lē o se tupe laititi lea ua faamatu’u atu mo le poloketi. Lua miliona tala i le tausaga, $10 miliona i le lima tausaga, $510 miliona i le 5 tausaga, e lē o se tupe laititi..”
“O lo’o iai lu’itau i le taimi nei, peita’i o le fa’atūina o lenei Pulega Fou, o le ā matuā ta’i lelei ma su’i tonu le mata o le niu, i vaega togia uma e fuafua ma fa’atino ai le atina’e o Itumālō..
“E tele vaega o le tapenaga e mo’omia e pei o le tapenaina o se Tulafono Autū e fa’agaioi ai lenei Pulega Fou, o le fa’atulagaina o galuega, matāfaioi ma tiute o le Pulega, tagata faigaluega ma vaegātupe e mo’omia e fa’atino ai.”
Saunoa le Palemia o lenei galuega o le ā gafa ma itutino o le Mālō e fitoitonu ma nei matāfaioi, e aofia ai le Matāgaluega o Fa’alapotopotoga a le Mālō (MPE), Komisi o Galuega a le Mālō (PSC) Matāgaluega o Tupe, Loia Sili ma isi Matāgaluega e feso’ota’i iai.”
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
