25 Ianuari 2026 Apia Samoa. Ua faatuina e le Malo se Komiti Faapitoa e mataʻituina le tulaga o loo iai nei i le auina mai o oloa mai fafo. E taitaia lenei komiti e le afioga i le Alii Palemia ae auai ai le Minisita o Tupe, Minisita o Tiute ma le Minisita o Lafoga.
O lea faaiuga sa faailoa mai e le afioga i le Palemia le Susuga i le Laaulialemalietoa Leuatea Polataivao Fosi Schmidt, i lana feiloaiga ma le vasega o tusitala i le Aso Faraile 23 Ianuari.
O le matafaioi a lea komiti, e pei ona saunoa le Palemia, ina ia maua uma e le Malo tiute e tatau ona maua mai oloa o loo faaulufale mai i totonu o le atunuu.
“E latou te iloiloina ma toe faagaioia auala e fuafua iai tiute ma lafoga talafeagai, e aofia ai Import Duty, Taxes, GST ma isi lava lafoga e tatau ona totogi..”
Saunoa le Palemia o lenei mataupu e lē o se mataupu fou, ma ua iai nei faamaoniga, ua leva tele ona feagai ma le Ofisa o Tiute lenei faafitauli.
Saunoa le Palemia, o lo’o maitauina pea le lē tutusa o faamatalaga e ala i invoices o lo’o tuuina atu e nisi o le au faipisinisi, e faaaogā e fuafua iai e le Ofisa o Tiute le aofaiga saʻo o tiute e tatau ona totogi i oloa o loo auina mai i totonu o le atunuu.
O le mau a le Palemia, o loo iai faamaoniga manino e faapea, o nisi invoices e faailoa mai ai tau maualuluga, ae o nisi ua tu’uina mai ai tau e matuā lē talitonuina lava..”
O le mau a le Palemia, o le tulaga lena ua mafua ai ona lē atoatoa le aoina e le Malo o tiute ma lafoga e tatau ona aoina.
“Ua maualalo tau o isi oloa, maualuluga tau o isi oloa..”
Saunoa fo’i Laaulialemalietoa, ua maitauina le lē tutusa o auala o loo faatino ai pisinisi a nisi o faipisinisi ua leva ona galulue i totonu o le atunuu, pe ā faatusatusa i nisi o kamupani fou ua faatoa taunuu mai i Samoa.
“Ae ua vave tele ona atinaeina a latou oloa..”
Saunoa le Palemia, o lea itū o loo aliali mai ai le lē tutusa o le aofaiga o tiute o loo totogi e nā kamupani fou, pe ā faatusatusa i tiute o loo totogi e isi kamupani ua leva ona iai.
“E lē gata i lea, ua maitauina foi le lē tutusa o le totogiina o lafoga a nisi o faipisinisi tetele, pe a faatusatusa i isi faipisinisi o loo galulue i le vaega o oloa auina mai i fafo..”
O le mau a le Palemia, e lē o level le malae taalo o lo’o faatino ai pisinisi a le au faioloa, pe afai e lē o totogi lafoga uma.
O le isi itū tāua sa saunoa iai le Palemia, o le auina mai lea o oloa e lē atoatoa poo oloa taugofie, ae lē talafeagai le maualuga o tau o lo’o faatau atu ai i le mamalu o le atunuu.
“E lē o tutusa le quality ma tulaga o le tau o oloa nei..”
O le Komiti Faapitoa lea ua faatuina e le Kapeneta, o le a latou iloiloina uma itū nei, ma faamaonia uma invoices o oloa o loo auina mai i fafo ina ia maua uma e le Malo tiute ma taxes e tatau ona maua i oloa uma e faaulufale mai i totonu o le atunuu..”
Saunoa le Palemia, o tiute nei e tuuina atu i luga o oloa mai fafo, o se tasi lea o auala tāua e tua iai le Malo mo tupe maua e atinae ai Samoa.
“O loo iai pea isi kamupani o lo’o fe’alo’alofa’i..”
- Toa Samoa Rewrite Record Books in 78–4 World Cup Rout of France - October 17, 2026
- Carrying Samoa from Salailua Palauli to the International Stage - October 16, 2026
- Prime Minister Commends Samoa Basketball’s 50% Local Player Policy: Go with Confidence, Play with Heart - October 16, 2026
