Faatonuina e le Faamasinoga se Loia Totogi e le Malo mo se Tinā ua Tuuaia i le Maliu o Lana Tama Teine

0
367

Aso Gafua 12 Tesema 2022 Mulinuu Apia Samoa. Ua faatonuina nei e le Faamasinoga Maualuga le tuuina atu o se loia e totogi i lalo o le polokalame fesoasoani a le Malo (Legal Aid) mo le mataupu a se tinā o loo tuua’ia i le maliu ai o lana tama teine.

O le taeao nei sa valaau ai le mataupu a Susana Lavea Lala mai le afioaga o Toamua ma Safotu i luma o le Alii Faamasino ia Fepuleai Ameperosa Roma i le Faamasinoga Maualuga.

O lenei tinā o loo molia e leoleo ina ua ia togiina se maa, ma lavea ai le ulu o si ana tama teine e 13 tausaga le matua.

Sa talosaga le itu a le Loia Sili (Prosecution) mo se taimi e faamautu mai ai moliaga.

Saunoa le Alii Faamasino ia Fepuleai, o se avanoa foi lea e tuu atu i le tinā e saili ai sana loia e tulai mo ia.

Sa fesiligia e le Alii faamasino Fepuleai Ameperosa Roma le tinā ia Susana pe manao e sue sana loia, ae peitai na tali le tina, “na te lē gafatia ona totogi se loia.”

Na saunoa Fepuleai i lea tinā, e agai e saili se loia e tulai mo ia, ae totogi e le Malo. Sa faatonuina foi e Fepuleai le Resitara ina ia tapena le faatinoina o lea talosaga i ona masani uma.

O se lipoti mai le Sui Komesina a le Matagaluega a Leoleo, Papalii Monalisa Tiai-Keti, e faapea

“E tusa ai ma suesuega a le Matagaluega, o Susana sa faa’oolima i le isi ana tama teine, peitai, na mamulu ese mai iā te ia, ma tamoe ese atu..

O lea e tuuaia ai lenei tinā, e faapea sa ia faa’aogaina se maa e togi ai lana tama o loo sola ese, ae lavea ai le isi ana tama sa lata ane.

Tā’ua foi e Papalii, o lenei faalavelave sa tulai mai i se Aso Faraile, ae o le pō o le aso Toanai, ina ua mavae le silia ma le 24 itula, sa faato’ā faatopetope atu ai le teinetiti i le falemai ina ua tigaina o ia. Sa maliu ai lava o ia i lea po i le falamai i Motootua

Ua faatulaga nei e le Faamasinoga le Aso 19 o le masina nei e toe fofogaina ai lenei mataupu, ae sei faamautu mai ai foi moliaga le itu o le Loia Sili.