Faatoese le Komiti Faatonu a Felela Malisi i se Fa’afitauli sa tulai mai i le Taamilosaga Su’egā Siamupini o Lakapi a Kolisi

I le agaga maualalo, matou te fa’ato'ese atu ai ia i latou uma na a’afia i lena aso, aemaise le Kolisi o Amoa ma lana tapuaiga, ona o amio lē taupulea a nisi o tama a'oga mai Sagato Iosefo.

0
125

FA’ATOESEGA FA’ALAUA’ITELE

A LE KOLISI O SAGATO IOSEFO

O le a taoto ia fa’amaene o le tai loloto ou paia Samoa o oe o le ao mamala. Ae matou te fa’atulou atu i ou paia le popo ma ou pa e le solo, mai le oneone le ufitia o le Tuimanu’a se’ia pa’ia le oneone sina i Fili ma Puletu’u na tauilo ai manū o malo. Tulou, Tulou, Tulouna lava.

A’e muamua ona matou taia le pula ma le vaiafei ma o matou asuasu atu vaimalu i pu’ega ona ose fa’afitauli sa tulai mai i le taamilosaga su’egā siamupini i le taaloga lakapi a Kolisi sa faatinoina i le Aso 3 o Me 2024, i Alafua i le malae o le Kolisi o Sagato Iosefo.

O le mea moni, ua sopoutu nisi o le fanau a’oga, ma o se lape foi lea i le Alii Felela Pule, le Vasega o Faiaoga, a’e o se fa’aletonu foi lea ole Taitaifono ma le Komiti Fa’atonu o A’oga, fa’apea le Aiga Felela Malisi i Samoa nei.

I le agaga maualalo, matou te fa’ato’ese atu ai ia i latou uma na a’afia i lena aso, aemaise le Kolisi o Amoa ma lana tapuaiga, ona o amio lē taupulea a nisi o tama a’oga mai Sagato Iosefo. E momoli atu fo’i vaimalu i pu’ega i lau tapua’iga Samoa ona o aga le tautamalii a nisi o le fanau a’oga.

O upu a le Atunu’u, o le sala a le Tautai e totogi, matou te talitonu, e aoga lenei fa’asalaga e toe poupou ai le ola a’oa’oina o le fanau, toe fa’amalosia le amio pulea ma toe tapu’e ai le Silipi Malisi o tama a’oga o le Kolisi o Sagato Iosefo, e fa’avae i le loto maualalo, le alofa ma le fa’aalo’alo.

Matou te fa’amoemoe atu i lo outou finagalo malamalama, e talia ai lenei fa’amaualaloga.

I le ava ma le migao tele.

Ona o le fautua tatalo a le Tinā Paia o Maria.

…………………………………………………….

Tuatagaloa Aumua Ming Leung Wai

TAITAIFONO, KOMITI FAATONU O AOGA A FELELA MALISI