24 Aperila 2019, Malua, Samoa. Ua saunoa mai le Failautusi Aoao a le Ekalesia Faapotopotoa Kerisiano i Samoa (EFKS) o le mataupu i lafoga a faifeau e le mafai ona toe faatalanoaina sei maea le 3 tausaga e tusa ai ma faiga faavae a le Ekelasia.
O se iugafono a le Ekalesia e le taliaina ai le resitaraina o faifeau mo lafoga o tupe maua (income tax), sa faia lea i le tausaga 2017 ma faamaoniaina i le 2018.
O se aafiaga o lenei faaiuga, o le molia ai nei o faafeagaiga a to’a luasefulu i luma o le fa’amasinoga ona o le le resitaraina o a latou suafa mo le totogiina o lafoga.
I le faasologa o mataupu o le fonotele sa fesiligia ai e se tasi o sui mai le Fa’asaleleaga le mataupu lea ma e fa’apea e tatau ona toe fa’atalanoaina le iugafono i lafoga.
Ae peita’i sa tula’i le Ta’ita’ifono a le Ekalesia Aoao, Reverend Elder Tautiaga Senara ma fa’amanatu i le Fonotele faiga fa’avae a le Ekalesia e fa’asaga i se mataupu ua uma ona i’ugafonoina.
I le fa’atalanoaga a le Failautusi Aoao a le Ekalesia, Reverend Vavatau Taufao ma le EFKS TV i le taeao ananafi sa fa’amalamalama mai ai e le Failautusi le tulaga na mafua ai ona le mafai ona fa’atalanoaina le amataupu lea i le fonotele lenei.
“A fa’apea e fai se i’ugafono a le fonotele, e fa’atoa toe mafai lava ona toe talanoaina le iugafono lena pe a atoa le 3 tausaga,” o le saunoaga lea a Vavatau Taufao.
“O lea la e le mafai ona talanoaina i le fonotele, le mataupu lea ona se’iloga lava e atoa le 3 tasuaga.”
Sa ia saunoa fo’i e tusa ai ma nisi o fa’amatalaga ua agia i luga o le ea e fa’apea e fa’atoa mafai ona talanoaina le mataupu lea i le fonotele i le tausaga fou, e le sa’o lea.
“E le atoa fo’i i le tausaga fou se tolu tausaga o le iugafono, o le tala lea e fa’apea o le tausaga fou e atoa ai le 3 tausaga e sese lena tala.
“Manatua fo’i o le i’ugafono fa’atoa fai i le 2017 pau le mafua’aga na ala ai ona talanoaina i le tausaga na te’a atu nei ona o le tausaga e 2018 e pasia ai i’ugafono o le 2017.
“O lona uiga la 2017 lea na fai ai le i’ugafono, 2018, 2019, 2020 e fa’atoa atoa ai le 3 tausaga ae e fa’atoa agava’a la le mataupu lea i le toe talanoaina i le Fonotele i le tausaga e 2021.
“Po’o le a la le faiga e fai ai, ae ona o le fa’avae lena a le ekalesia ma i’ugafono na o le fonotele.”
(0)
