Faatino ta’otoga faapitoa o tino maliliu sa taofia ona o suesuega a leoleo i faalavelave matuiā

Ua faamaonia mai e le Komesina o le Matagaluega o Leoleo, Auapaau Logoitino Filipo, le taunuu mai lea o le fomai faapitoa na te faatinoina ta’otoga mo tino maliliu o loo taofia i le falemaliu i Motootua.

Saunoa Auapaau o se fomai faapitoa mai Fiti, o le a ia faatautaia lea galuega.

E ono ni tino maliu sa talia ta’otoga faapitoa, ona o suesuega a leoleo i nisi o mataupu ogaoga na tulai mai.

E aofia ai se tamā 60 tausaga ma sona atalii 18 tausaga mai Fogapoa, lea na maliliu i se fe’eseeseaiga i fanua.

O le isi mataupu, o se tamā e 45 tausaga mai Ulutogia, lea na maliu i le amataga o le masina nei ina ua faaman’ualia o ia i se fevesiaga i luga o inugā ava malosi.

O se Alii leoleo mai Safotu lea e galue i le ofisa leoleo i Fagamalo, sa maliu ona o le ogaoga o manuaga i lona tino.

E faapena foi se tamã e 45 tausaga mai Lalomauga, lea na maliu i le Aso Toanai ao lumanai ai le Aso Sa o tamā, ina ua tanumia lona tino i se laau o loo masalomia sa pa’u iai ao fai se galuega i lona lava fanua.

O le isi tino maliu o se talavou na maliu mai Aleisa i se fevesiaga i le va o tupulaga talavou.

Sa faatino e le fomai faapitoa mai Fiti nei taotoga mai le Aso Faraile ua tea nei, ma galue ai i le weekend. O se aso o lenei vaiaso o le a toe taliu ai le alii fomai.

Saunoa Auapaau, “O le ma’ea ai o taotoga o i latou nei ona mafai lea ona agavaa mo le auina atu o tino maliu i tua, auā toe sauniga ma tapenaga a aiga ua leva ona taligā.”

O se tasi lea o mataupu sa poloaina ai e le tamaitai faamasino Alalatoa Rosella Viane Papalii le Matagaluega o Leoleo mo le faatinoina o taotoga mo i latou ua maliliu o loo taofia i Motootua ona o ni aafiaga i faalavelave.

(2)