O le taeao nei, Aso Faraile, 22 o Aokuso, 2025, sa fa’atauto ai le Afioga iā Tauiliili Tauaaletoa Sekuini Solomona Auelua, e avea ma Peresitene Lagolago o le Fa’amasinoga o Fanua ma Suafa.
Sa faatinoina taualumaga o le Faamasinoga i luma o le Peresitene o le Fa’amasinoga o Fanua ma Suafa, Sui Peresitene ma le mamalu o le au vala’aulia.
Sa fa’ataunu’uina lea i le Potu Fa’amasino i Mulinu’u, ma mafai ona auai atu iai aiga, uo ma aumeamamae e lagolagoina lea faamoemoe.
Na saunoa fa’afeiloa’i le Afioga i le Pule Sili/Resitara o le Matagaluega o Fa’amasinoga ma le Fa’afoeina o Tulaga tau Fa’amasinoga iā Papali’i John Tamailelagi Afele, e tatala aloa’ia ai le fa’amoemoe.
O le sauniga o le fa’atautoga sa taitaiina e le susuga i le fa’afeagaiga ia Rev. Vereniki Batiyaka mo sina upu fa’amalosi e tomatauina ai le fa’amoemoe.
Na soso’o ai ma le saunoaga a le Afioga ia Tauiliili e fa’afetaia le Peresitene ma le Komisi mo le talitonuina o ia e tauaveina lenei tofiga tāua.
Sa ia fa’afetaia foi le tapuaiga a lona aiga, ekalesia ma le afioaga mo le nofotatalo i ona tiute o feagai ai, ma sa ia tauto o le’ā ia galue ma le fa’amaoni i lona tofiga fou e tautua ai le atunu’u.
Na saunoa fa’amanuia le Afioga i le Peresitene o le Fa’amasinoga o Fanua ma Suafa; Afioga Lesa Rapi Vaai i le tula’i mai ai o le Afioga ia Tauiliili i lona tofiga fou.
Sa saunoa fa’aiu le Afioga ia Papali’i ma fa’aiuina ai taualumaga o le fa’amasinoga.
“E avea foi lenei avanoa e momoli atu ai fa’amanuiaga a le Matagaluega o Fa’amasinoga mo le Afioga ia Tauiliili i lona tula’i mai e avea ma Peresitene Lagolago o le Fa’amasinoga o Fanua ma Suafa auā matāfaioi o le a feagai ai.”
Public Notices
- Justice Alalatoa Rosella Papalii Receives Distinguished Alumni Award - October 11, 2026
- Samoa Wins Best Host Country Recognition at Miss Global - October 9, 2026
- ‘Ia Manumalo’: Signature Choir Releases New Anthem - October 9, 2026
