Faatautō Nisi o Tamalii e Avea ma Peresitene Lagolago o le Faamasinoga Fanua ma Suafa

0
2114

O le Aso Faraile nei na faatauto ai nisi o tamalii o loo avea ma Faamasino o le Faamasinoga o Fanua ma Suafa (LTC) e avea ma Peresitene Lagolago.

O le afioga ia Leaupepe Fatu Pula, faapea le tofa ia Masinalupe Tusipa Masinalupe lea ua avea ma Peresitene Lagolago e faamāmā avega ma fesoasoani atu ai i le galuega a le Peresitene.

Sa pueina mai i se ata video i luga o le Facebook a le Matagaluega nei faatautoga, sa faia na o nisi lava o le Matagaluega, i luma o le Peresitene, le afioga Lesatele Rapi Vaai. 

I se faatalanoaga ma le Minisita o Faamasinoga sa faamaonia ai e le afioga Matamua Seumanu Vasati Sili nei tofiga.

Afioga i le tamaitai Minisita, Matamua Seumanu Vasati Sili.

Saunoa le Minisita, o nei tamalii ua loa foi lo lā’ua soifua galue i le Matagaluega o Faamasinoga.

“O ni matai tausi aiga ae o ni tamalii fai tofa, ua alagatatau foi ona tuuina atu iai lea tofiga..”

O le afioga ia Leaupepe Fatu Pula, sa galue o ia o se Sui Komesina o le Matagaluega o Leoleo ae lei tofiaina e avea ma Faamasino o le Faamasinoga o Fanua ma Suafa.

O le tofa ia Masinalupe Tusipa Masinalupe, o se tamalii ua loa tausaga o tautua i le Matagaluega o Faamasinoga, ma avea ai o ia ma Pule Sili o le Matagaluega.

Masinalupe Tupai Tuuu Tusipa Masinalupe.

O le tausaga 1975 sa amata galue mai ai lea tamalii i le Matagaluega ma ua silia nei ma le 46 tausaga o galue Masinalupe i le Matagaluega. Sa tele ni tausaga o galue o ia o se Sui Resitara, ma tofia ai loa i le tausaga 2001 e avea ma Pule Sili seia oo atu i le 2016.

Sa tā’ua foi e le afioga i le Minisita, o le alii loia ia Afamasaga Michael Soonalole, o le a avea o ia e fai ma Sui Peresitene o le Faamasinoga o Fanua ma Suafa. O lea tofiga o le a faamautu i le vaiaso fou.