Faa-Samoa

FA’ATAUTŌ LE AFIOGA IĀ LOAU MA FA’AMASINO O LE FA’AMASINOGA MAUĀLUGA

July 25, 2025

309

Tusia: Pesetā Tusiga Taofiga, Government Press. “O a’u o Loau Le’afa Donald Kerslake, ou te tautō i le Atua o lē ona le malosi uma lava, o le ā ou tautua lelei ma le fa’amaoni i le Mālō Tuto’atasi o Samoa, e tusa ai ma le Fa’avae ma le Tulafono, ma o le ā ou faia le amiotonu i itu’āiga uma o tagata e aunoa ma le fefe po’o le fa’apito, alofa fa’aitu’au, po’o le loto tigā. Ia fesoasoani mai le Atua iā te a’u.”

O le ta’utinoga lea a le afioga i le Fa’amasino Fou mo le Fa’amasinoga Mauāluga a Samoa i luma o Lana Afioga i le Ao Mamalu o le Mālō Tuto’atasi o Samoa a’o lona ‘ā’ao taumatau i luga o le Afioga Pa’ia a le Atua.

O le afioga iā Loau, o lo’o galue nei o se Fa’amasino mo le Fa’amasinoga Fa’aitumālō i le atunu’u, peita’i ua filifilia e ala i tofiga a le Fa’amasinoga, ma ua se’e atu ai e tautua ma galue ai mo le Fa’amasinoga Mauāluga e ala i matā’upu tau soligātulafono e tu’uina atu i le Fa’amasinoga mo sana fa’ai’uga talafeagai.

**Afifio mai loa i le Island Rock! Father’s Day Specials!**

I lana saunoaga fa’afetai i le mae’a ai o lana fa’atautoga i le asō, ma ia folasia manino ai, le lē itiiti o lana silasila i le fa’aeaea a le Fa’amasinoga ua tofia ai o ia, fa’apea ai ma le lagolagosua a’o le fautua lē muta a ona mātua, ‘āiga ma lona to’alua fa’apea uō mamae, ina ia tini taunu’u ona tiute uma e ala i le fa’alagolagomaga mai le Agaga Pa’ia o le Atua.

Saunoa Loau;

“Ua taunu’u le fa’amoemoe, o le lā’au o le soifua lea. Ua faia e le Atua lenei aso tatou te fiafia ma olioli ai, o lana valā’au i tofiga e tautua ai i le atunu’u..

“O le vi’iga ma le fa’afetai. O le fa’amanū ma le fa’ane’etaga i lo tatou Tapā’au Sili i le Lagi, e pei ona ta’imua ai i lenei sauniga mamalu i tima’iga a lau Susuga i le Fa’afeagaiga iā Rev. Onosa’i So’o..

“Fa’afetai tele. Ua mauāluga lenei Sauniga Fa’alemālō i le fa’atinoina lea e lau Afioga i le Ao Mamalu o le Mālō Tuto’atasi o Samoa..

“Fa’afetai i le fa’atuatuaga o lau Afioga i le Fa’amasino Sili o lo’u nei tagata. Ma o le ā ou taumafai i le mea e gata ai lo’u malosi, e fa’atino ai o’u tiute o le Fa’amasino o le Fa’amsinoga Mauāluga i le Fesoasoani mai o le Atua iā te a’u..

“I Fa’amasino, fa’afetai tele i lā tatou mafutaga fa’ale-galuega, aemaise la outou tōfā ma le fa’autautaga o lo’o fa’afoe ai la tatou galuega. I lau Afioga i le Fa’amasino Sinia o le Fa’amasinoga Fa’aitumālō. Fa’afetai tele auā o lo’o e fa’atonu folau i la tatou galuega i le Fa’amasinoga Fa’aitumālō aemaise fo’i le soifua fa’ale-agaga.

“Ua ou tula’i atu i tou luma i lenei taeao, auā sa i ai ē na tapenaina lo’u nei tagata. Fa’amālō i mātua i lau Susuga Tagaloa ma Dr. Maria i le moni o le alofa. Fa’apea fo’i i lau afioga i le Komesina o le Gagana Samoa, Lau Susuga i le Faifeau Mālōlō Manumālō iā Rev. Vaiao Alailima – Eteuati ma le tinā iā Erolini.

“Mālō le fautua fa’afetai tatalo.

“Fa’afetai Peta ma le ta fanau, i le lagolago i la’u galuega. Fa’apea uso ma tuafafine. I le tapuā’iga o ‘āiga, afio’aga, ekalesia ma uō, mālō tatalo ma le fa’amalosi’au..

“Fa’amālūlū atu pe ā fa’apea ua lē atoa se matou fa’amatalaga, auā e i ai lava le talitonuga, o Samoa o le va’a fa’aufigatā, o le ao mamala, o le fue lavelave, o le i’a iviivia, ae talosia le alofa o le Atua, a tatala le filialii, ia to’ese a nu’u potopoto.”

Ata Pu’eina: Leaosā Fa’aifo Fa’aifo.

Vacancies