16 Setema 2019, Mulinuu Apia Samoa. Na faatumulia le potu faamasino numera tolu o le Faamasinoga o Fanua ma Suafa i le aoauli nei i le paia ma le mamalu o le atunuu, ae le gata i lea o aiga o i latou e toatolu sa faatautoina i se sauniga faapitoa.
Ua faamanuiaina nei le Tofa Leilua Opapo Sonai, Tofa Tuautu Kalepo Tuautu faapea le Susuga Leu Alani Ulia e avea ma faamasino o le Faamasinoga o Fanua ma Suafa i Samoa.
O le susuga ia Rev Pita Toleafoa na ia taitaiina le sauniga ma ia faalaeiau ai e faapea
“Ia faagagana outou e le Atua ma ia faa Le Atua a outou faaiuga, ma mea e fai, ina ia atagia ai lana faamasinoga amiotonu, ia atagia ai lona mamalu silisiliese ma lona alofa na valaauina ai lo tou soifua ma lo tatou ola, e fua mai lena i le fealofaniga o aiga, o le nofo lelei o nuu, o le maopoopoga o Itumalo, ma le toafilemu o le atunuu”
O le afioga i le tamaita’i sui faamasino sili ia Niava Mata Tuatagaloa Keli na saunoa i le faatautoga o Faamasino fou.
I lana saunoga na ia faamamafa ai mea nei
“E taua le Faamasinoga o Fanua ma Suafa o Samoa ona o loo tagofia ai measina a aiga, o le afuaaga ma le mafuaaga lea o le soifua o soo se tagata Samoa, o loo afei ma tapui ai le faasinomaga, ma le mitamitaga o le tagata Samoa”
Sa ia faamamafa le galuega faa faamasino e le o se galuega faigofie, tele ona luitau ae aua nei galo le aso lenei ma le tautoga ua faatinoina lea i luma o le Atua.
“E luluina outou e le alofa, e iai fo’i taimi e osofia ai i le fiafia, ae ta’ita’i tama le tautoga- O LE A E FAIA LE AMIOTONU I ITUAIGA UMA O TAGATA E AUNOA MA LE FEFE, MA LE FAAITUAU, ALOFA POO LE ITA”
O faamasino e toatolu e pei ona saunoa le tamaitai Ofisa sili o Pulega o le matagaluega o Faamasinoga ia Moliei Vaai, ua faanatinati ona faatauto ona o le tulaga o lea ua faase’etuagalu le va’a se’e tolu o nisi o faamasino o le Faamasinoga o Fanua ma Suafa ona o loo faia iai se suesuega a le Justice Service Committee, ona o nisi o tuuaiga.
E lua avanoa sa faasalalauina peitai o lea ua faatautoina i latou e toatolu.
O e ua faamanuiaina e aofia ai le Susuga i le Alii faifeau, poo le Tofa Leilua Opapo Sona’i sa galue ai foi mo le malo i le matagaluega o Faatoaga i le 13 tausaga a’o lei ulufale atu i Malua. Ua 61 tausaga o lona soifua, ma e toafitu o laua alo. O loo ia umiaina le faailoga o le BA History.
O le Tofa ia Tuautu Kalepo Tuautu, sa galue ai mo le ofisa o Pepa Fanau, ae o le Susuga ia Leu Alani Ulia o se sa avea ma faatonu o le Faamasinoga o Fanua ma Suafa.
Saunoa le tamaitai Sui Faamasino Sili,
” E laualuga i le tofi faa-Faamasino le amiotonu, ia leotele le amiotonu i le faiga o faaiuga ma le faatinoina o galuega”
(2)
