Pepa o Fa’amatalaga . O le Aso 19 o Iuni 2025 sa fa’ataunuuina ai le Fonotaga Faaletausaga lona 14 a le Faaputugatupe Teufaafaigaluega a le Tausi Mavaega a Samoa (UTOS) mo Sui-Faiiunite i le maota fono a le TATTE.
Sa maitauina le toatele o sui-fai iunite sa auai i le fonotaga, e le gata ia ilatou sa mafai ona auai atu i le maota fono, faapea latou sa fa’aaogaina auala faa-tekenolosi e fono ai mai maota ma laoa.
O le fetalaiga ia Fainuulelei James Ah Wai – le Ofisa Sili Lagolago mo le Vaega mo Auaunaga Faa -Tekenelosi sa avea ma Fofoga o le Fono, na ia faafeiloai le Au-Faiiunite, le Tausi Mavaega, le Afioga i le Minisita o Tupe, le Komiti Faatonu, le Sue Tusi faapea le aufaigaluega a le Kamupani o Pulega.
O le Susuga ia Rev. Mariota Siaea sa ia ta’ita’ia le fonotaga i se tatalo puupuu, ma sosoo ai ma le saunoaga a le Susuga ia Taito John Roache o le sui o Tausi Mavaega, lea sa faailoa ai nisi o suiga fou ua iai mo le Kamupani o Pulega.
Sa faasilasila e Taito le se’e ese ai o le Afioga ia Magele Arthur Penn mai le tofiga o le Taitaifono o le Komiti Faatonu, ma ua avea ai le Afioga ia Seulupe Michelle Macdonald ma Sui Taitatifono mo le taimi nei.
Sa faasilasila foi e le Tausi Mavaega le se’e ese ai o le afioga ia Tevaga Viane Tagiilima mai le tofi o le Ofisa Sili o Pulega ma ua sui tulaga ai nei le Afioga ia Malaeulu Aysha Rimoni.
Sa faafetaia e le Tausi Mavaega le Afioga ia Magele faapea le Tofa ia Tevaga mo le tautua matavela aemaise galuega fitā sa feagai ma lāua.
Na faai’u le saunoaga a le Tausi Mavaega i le ta’utinoga e faapea, ua mae’a faatino le tiute a le Tausi Mavaega mo a tatou sui-faiiunite, ma ua fa’amaonia le faatuatuina o le Kamupani o Pulega i le faatinoina o ana galuega e tusa ai ma ta’iala ma tulafono o le Malo.
Mo le saunoaga autū o le fono faaletausaga, sa saunoa ai le Afioga i le Minisita o Tupe, le Afioga ia Lautimuia Afoa Uelese Vaai e faapea, e ui lava i suiga ua iai nei le faigamalo a’o loma le faigapalota a le atunuu, o loo tumau pea lo latou naunautaiga ina ia manuia o tatou tagata. Sa ia faailoa le tāua o auaunaga a le UTOS, faapea foi le ō gatasi o ia auaunaga ma fuafuaga a le Mālō.
Sa ia ave le faamalo i le le aufaigaluega mo latou galuega lelei sa faatino, faapea lo latou ave o le faamuamua ma le lagolagoina o poloketi mo aulotu, nuu ma afioaga, aiga ma tagata ta’itoatasi ina ia maua so latou lumana’I manuia.
Sa faamālosi’au le Afioga i le Minisita i le Komiti Faatonu faapea le aufaigaluega a le Kamupani o Pulega, ina ia sāilia pea avanoa lelei mo ni teugatupe teufaafaigaluega, faapea le taumafai e siitia le silafia o tagata lautele i tulaga tau teugatupe, faapea le faaaogaina o tekenolosi fou e tatou tagata.
Na faai’u le saunoaga a le Afioga i le Minisita i lona faafetaia lea o lāua Afioga sa avea ma Ta’itaifono o le Komiti Faatonu faapea le Ofisa Sili o Pulega o le Kamupani o Pulega, mo la galuega filigā sa faatino a’o tautuaina le mamalu o le au-faiiunite ma le atunuu. Sa faamanuia foi i le Pule Sili fou, ma toe faamalosi’au i le aufaigaluega ina ia faa-tumauina pea le maualuga o auaunaga mo Sāmoa.
I le māea ai o tulaga aloa’ia i ona vaega masani, sa amatalia ai loa le fonotaga a sui – faiiunite,, ma o le mataupu autū sa talanoaina, o le iloiloina lea o le Lipoti Faaletausaga mo le tausaga Faaletupe 2024, ma sa autasi le au-faiiunite e pasialea lipoti.
UTOS
O le Faaputugātupe Teufa’afaigaluega o Mavaega Tausi o Samoa, o se faaputugātupe tūmaoti e pulea e le aufaiiunite ma ua tu’uina atu le fa’atuatuaga i le Kamupani tau Mavaega Tausi, e va’aia ma tausia uma latou meatōtino.
O nei meatōtino, e aofia ai ma vaegātupe o lo’o teufa’afaigaluega i vaega ese’ese o le tamāoaiga e maua mai ai ni seleni fa’aaopopo, e pei o tupe teu fa’avaitaimi i faletupe, nonōgatupe malupuipuia i le Mālo o Samoa ma sea i totonu o kamupani t ūmaoti i Samoa nei ma le Pasefika.
O le anava fa’aagafeso’otai a le fa’aputugātupe, o le manuia lea o tagata uma, ia saunia ni auala faigofie ma taugofie e teufa’afaigaluega ai seleni a so’o se tagātanu’u o Sāmoa. Ae o lana anava fa’apisinisi, ia ausia ni tupe fa’asili mo aufaiiunite mai ana teugātupe ua māea ona iloilo toto’a.
Mo nisi fa’amatalaga e uiga i lau teugātupe teufa’afaigaluegai le UTOS, fa’amolemole fa’afeso’otai mai le tatou ofisa i le +685 29916 poo o le +685 29649.
E mafai foi ona imeli mai i le info@utos.ws po’o le faafeso’otai mai i le tatou Facebook Page – Unit Trust of Samoa pe agai foi I luga o le matou upegatafailagi i le tuatusi o le www.utos.ws.
- Court Dismisses Petition Against Safata MP - October 9, 2026
- Police Investigate Man’s Body Found on Small Sandbar Off the Coast of Palolo Deep - September 28, 2026
- Photo of the Day: Beautiful Rainbow Over Aopo - September 28, 2026
