Tusia: Pesetā Tusiga Taofiga, Apia Samoa. E le’i ‘alo le tu’ualalo ma le fautua a le afioga i le Palemia iā La’aulialemalietoa Polāta’ivao Leuatea Fosi Schmidt i le Aufa’asalalau ma Tusitala.
“Tautuanā ia fa’amaoni i le lipotiina o tala sa’o ma le moni auā le nofo silafia o le atunu’u lautele.”
O atugāluga o le Palemia, ona e iai nisi o le au faasalalau, ua maitauina le mimilo o matā’upu, ma ‘ese mamao ai mafua’aga na afua ai ma le fa’auigaina e le tusitala lava ia.
O ia gaioiga, ua fa’ailoa manino e La’aulialemalietoa, e lē taliaina e ia o le Ta’ita’i o le Mālō.
Mo le silafia, i le uma ona fa’atautō o le Palemia ma le Faigāmālō Filifilia, na ta’utino lava e La’aulialemalietoa, o le ā fa’aauau pea i vaiaso ta’itasi feiloā’iga a Tusitala / Aufa’asalalau ma le Palemia.
O le a iai fo’i se isi o le Kapeneta e faaauauina pe afai e to’esea mo ni fonotaga fa’alemālō i atunu’u mamao le afioga i le alii Palemia.
O lona uiga, a mae’a Fonotaga a le Kapeneta i Aso Lulu o vaiaso ta’itasi, ona soso’o loa lea ma le feiloā’iga e fa’ailoa ai ni matā’upu ua fa’ai’ugāfonoina e le Kapeneta auā le nofo silafia e le mamalu o le atunuu.
Saunoa le Palemia, e lē taofia le galuega a le tusitala ma le fa’asalalau i matā’upu e lipotia auā le nofo malamalama o tagata, ae afai loa e fa’auiga sesē se lipoti tusia ona o ni talitonuga fa’aletagata, o le ā ono lē toe taliaina sea tusitala i ana feiloā’iga masani i le lumana’i.
O le galuega a tusitala, ia paleni itu e lua o se lipoti, ia atoatoa, moni ma sa’o fa’amaumauga e fua i ai le lipoti, ma ia ‘aua ‘aua lava ne’i fa’aitū’au.
Ta’utino e La’aulialemalietoa, o le ā tatala pea lona faitotoa mo le fesagā’iga ma le ‘āiga tusitala i le aga’i atu i lenei nofoā’iga lima tausaga.
“Fa’amolemole, fesili i matā’upu e manuia ai Samoa, ae tu’u fesili i matā’upu e atili tupu ai le vevesi o le atunu’u.”
Ata Pu’eina: Pesetā Tusiga Taofiga.
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
