29 Novema, 2019, Faamasinoga Maualuga. Ua faasala e le faamasinoga le alii o Tafuna Tauialo i le 3 tausaga i le falepuipui i le moliaga o le umiaina lea o le fualaau faasaina o le methamphetamine (aisa) e tusa lona mamafa ma le 25.8 kalama.
Ua faasalaina foi i le 3 tausaga i lona aumaia lea o lea fualaau faasaina i totonu o le atunuu, ma o lea faasalaga e toese mai ai le taimi sa nofo taofia ai ao faatali ai lona faamasinoga.
O le faaiuga na tuuina mai e le alii faamasino ia Leiataualesa Daryl Clarke i le faamasinoga maualuga i Mulinuu.
O le alii o Tafuna Tauialo 45 tausaga o le afioaga o Foailuga i Savaii ma le malo tele o Amerika, sa soifua mai i Amerika Samoa ae sa ola a’e i Foailuga i Savaii.
Sa toe malaga atu lea alii i Amerika Samoa ma faaauau ai ana aoga i le vasega 11. Na malaga atu i le malo tele o Amerika mulimuli ane ai nonofo ma lona aiga i Alaska, lea sa faigaluega ai i se vaa fagota mo le 22 tausaga.
Ua faaipoipo lea alii ma e toafa ona alo, toatolu mai lona toalua muamua ma le toatasi i lona toalua o loo nonofo ai nei.
O le molimau a lona toalua, na ia taua ai i le faamasinoga le tele o le aafiaga o lo latou aiga ina ua tulai mai le faafitauli lenei ia Tafuna. Sa taua foi o le galuega a lea alii sa tausi ai lo latou aiga faapea ai foi ma lona aiga i Savaii, sa faafofoga foi le faamasinoga i le tele o mau lelei i le olaga o lea alii mai lana faifeau ma tagata o lona aiga.
O tulaga e ogaoga ai le solitulafono a lea alii ona o le vaai lea a le itu a leoleo i aafiaga pe a faasalalauina lea fualaau faasaina i le atunuu.
E le gata i lea o le aofaiga o le mamafa o le fualaau faasaina sa maua i lea alii, ua faailoa ai o ia o loo auala mai ai (supplier) lea fualaau faasaina i totonu o Samoa.
O lea foi sa maua le nana ai e le ua faasalaina nei o le fualaau faasaina, atoa ai ma le le saogalemu o le fualaau faasaina sa maua i lea alii i tulaga tau puipuiga o tuaoi (border protection) o le atunuu.
E ui i lea sa amanaia foi e le faamasinoga le tulaga lelei o le soifuaga o lea alii e pei ona molimauina.
Ae i le filifiliga a le alii faamasino mo lana faaiuga sa ia tuuina mai ai tulaga nei, e taua mo le silafia, o le taumafai ina faaitiitia ma aua lava nei faamalosia tagata e faaulufale mai fualaau faasaina i Samoa.
“This is to act not only you but others who might think of importing Class A narcotics into Samoa”
Na faailoa foi e le alii faamasino o le tulaga o loo vaaia i atunuu e iai Niu Sila ma Ausetalia i le taofia ai o fualaau faasaina nei, o loo taumafai fo’i Samoa ina ia faatinoina. E ui e itiiti a tatou resources ae taumafai lava ina ia aua lava nei maua’a nei fualaau faasaina i lo tatou atunuu.
“This approach also reflects the reality that in smaller countries such as Samoa, we are less able than better resourced health systems such as New Zealand and Australia to deal with a methamphetamine epidemic. Deterrence at present plays an important role in stopping this and other Class A narcotics from taking permanent root in our comunity”
