Tusia: Perolini Numia Government Press. O le ulua’i Aso Sa o lenei masina fou o Novema 2025, na failotu fa’atasi uma ai tausala e to’a 12 o lo’o sā’ilia ai se Lalelei o Samoa i le Malumalu Tapua’i a le E.F.K.S. le Iupelī i Malua.
O se avanoa lelei, ua fai tapuā’iga fa’atasi ai ma le Susuga i le Puleā’oga, Faiā’oga fa’apea le mamalu i a’oa’o ma o latou faletua o lo’o i le Kolisi Fa’afaifeau a le Ekalesia Fa’apotopotoga Kerisiano i Samoa i Malua.
O le itu tāua o lenei feiloā’iga, ua saga fa’amautūina ai, le soifuaga kerisiano o le tama’ita’i Samoa moni, a’o se pine fa’amau i le tāua o le i ai o le sao o le Talalelei i le olaga o so’o se tagatānu’u Samoa.
O se laolao lelei, na momoli atu ai se fa’amanuiaga mai Susuga i Fa’afeagaiga ma A’oa’o Malua o lo’o galulue i le Kolisi Fa’afaifeau, auā le feagai ai o nei tamafanau a le atunu’u ma le sā’iliga o se Tausala o Samoa 2025 | 2026.
Na afea e tama’ita’i nei le Faletusi Fou a le Kolisi Fa’afaifeau i Malua fa’atasi ai ma le pu’eina o le latou ata i le pulela’a na fausia fa’apitoa mai le lā’au na fai ma ofaga e mapu i ai i latou na fa’aliliuina le Afioga Pa’ia a le Atua i le Gagana Samoa i le afio’aga o Avao.
Na latou molimauina fo’i nisi o galuega ua tino mai i le Fale Mata’aga i measina ma meataulima ua mamanuina e le Ā’oga Tusiata ma Ta Mamanu a Leulumoega Fou.
Mulimuli ane, faia le to’ana’i fa’atasi na tapenaina e le Susuga i le Puleā’oga, Faiā’oga ma Susuga i A’oa’o Malua ma o latou Faletua ma Tama’ita’i e to’a12, fa’atasi ma e o lo’o lagolagoina lenei fa’amoemoe tele.
E tele avamoa e fefa’asoaa’i ma fetufaa’i ai fautuaga fa’aleagaga, e poupou ai tapenaga uma a nei alo talavou o Samoa aemaise ai o lo latou lumana’i manuia.
O se amataga tāua lea mo Tausala uma e to’a 12 o le ā tauvā, o le maua lea o le avanoa e to’ele ai i le Atua, ina ia alofagia le fa’amoemoe o loloma nei.
Ata Pu’eina: Leota Marc Membrere.
Public Notices from your Samoa Shipping Corporation
- Tuala Siaki Reappointed to Lead Gambling Control Authority for Another Three Years - October 9, 2026
- Faatoese le Palemia mo le Faaaogaina o le upu “Heil Hitler” i le 2007 - October 6, 2026
- 14 Ofisa Sili a le Malo na Faatautoina - September 23, 2026
