O le aoauli o le Aso Faraile sa faatamaia ai i le afi se fale o se aiga faapea ma se atinae faleoloa.
I se ata sa pueina e se tasi o alii ma tuu mai i luga o upega tafailagi, o loo faailoaina mai ai lenei mu i le afioaga i Vaiee Safata, i le lata ai i le 12 i le aoauli.
I se faamatalaga sa tuuina mai e lenei molimau le susuga ia Daniel Vitaliano mai le afioaga o Mulivai Safata, o ia sa agai atu i le pamu kesi i Saanapu e utu lana taavale, ae o lana toe fo’i mai sa ia molimauina ai loa lenei faalavelave, sa faatamaia uma ai e le mu le fale o loo nonofo ai lenei aiga faapea ma le faleoloa.
“O le tala a le aiga o le taimi lava na amata ai le mu sa vili ai le ofisa o fuimu, ae ona o le mamao tele, e laki ae maua atu e le ofisa o fuimu ona sa maitauina lava le vave tele o le sasao o le afi.”
Ina ua fesiligia le susuga ia Daniel sa ia tāua ai, “E leiloa e se isi poo lea tonu le mafuaaga o le afi.”
I se vaaiga i le alaata (live) sa pueina e Daniel, o loo faailoa mai ai nisi o loo tamomoe mai fafo o le fale ma le faleoloa, ma nisi o loo tauvalaau i latou aiga e agai mai i fafo ina ne’i afaina ai se isi i le mu.
Sa vaaia foi nisi o le au fesoasoani o loo taumafai e tulei mamao ese le taavale a le aiga sa tu i luma ane o le fale.
I totonu lava o le tolu minute sa maitauina ai le sasao o le afi ma oo atu ai i le faleoloa lata ane.
Sa oo atu le auaunaga a le fuimu ma tineia le afi, ae ua tele ina faatamaia nei fale uma e lua.
