O lagona le mautonu ma le te’i ae o se faalavelave foi e le’i mafaufauina le faatama’ia atoa lea o le fale ma mea totino i le malaia.
E silia ma le $60,000 tala le faatupega o le fale ma mea totino a le tina o Siliva Ropati Tofaeono, 46 tausaga o Magiagi, lea na faatama’ia i le malaia lona maota i le afiafi nei.
Tā’ua e le tinā o Siliva, o ia ma lana fanau laiti e toatolu sa i totonu o le fale i le taimi na tupu ai le faalavelave, ae pau le vaega na ia vaaia, o le savali mai o lana tama laititi 6 tausaga ma le afi tusi, ae o le taimi lea ua vaai atu i le sasao a’e o le afi.
E le’i mau manatu Siliva i lea taimi e pei ona ia faailoa mai, ae na o le lagona o le te’i ma le lē mautonu.
“E leai se isi mea na olo’u tago atu aofai mai si a’u fanau ma matou tamomo’e loa i le matou aiga tuaoi e tuu ai la’u fanau.”
E tula’i mai lenei faalavelave e le o iai le tamā o le aiga i lea taimi, o loo alu e piki mai le isi ona tei o loo aoga le malini (sailor).
E ui ina sa vave ona tali atu le Pulega o le Ofisa Tinei mu (FESA) ma le galuega laveai, ae na vave lava ona sosolo le afi ona o le fale e fausia i le laupapa.
O le masini faitagamea, ogaumu alu i le uila, TV, telefoni, pusatu, moega, uaea fai pa povi, o matou lavalava faapea ofu aoga a is a’u fanau ma le tele o meāfale ua faamata’ia uma e le afi.
E ui ina tulai mai le faalavelave e pei ona aafia ai lo latou fale ma meatotino, ae ua faailoa e Siliva, “e faafetai i Le Alii ona e leai se isi o matou na aafia pe maimau se ola i lenei faalavelave.”
Na tā’ua e se tasi o le aufaigaluega a le tinei mu, o le a gafa ma le vaega faapitoa o suesuega tau mu le sailiga o le mafuaga o le faalavelave.
Vacancy with Pacific Ezy Money Transfer
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
