Faamafanafana le Taitaifono i ē o loo Faanofoesea

0
264

O se tusi atu lea a le Afioga i le Taitaifono o le Komiti mo Faalavelave Matuia ma Faalavelave Faafuasei, Agafili Tomaimano Shem Leo mo ē o loo faanonofoesea, ina ua faopoopo nisi aso se fitu.

Ua faamalo le pale, faafetai le soa ma le onosai ia te outou uma, a o tatou i ai i luitau o loo feagai nei ma le lalolagi atoa ma si o tatou atunuu, ona o le faamai o le koviti 19.

Ua lē ogatasi le uto ma le maene, i le fuafuaga na muai faataoto mo lo outou faanofoesea, ona o tulaga ua aliae mai e pei ona matou faailoa atu i lenei vaiaso. Ua finagalo ai le Malo, o le faaiuga ua talafeagai, o le toe faaopoopoina lea o le isi vaiaso mo lo outou faanofoesea, sei mataitu luitau ua aliae mai.  E matou te faapea atu o lenei faaiuga o loo faavae i le agaga ma le faamoemoe, ia malu puipuia pea si o tatou atunuu mai le pepesi o le faamai, ma ia mataitu ma le totoa lo outou paia mai nei aafiaga.

E tatalo atu le Komiti faamolemole ia lava papale ma to’a pea le tai, a o galulue le aufaigaluega a le Malo e faatino vaega moomia uma mo le puipuiga, ina ia mautinoa lo outou saogalemu i nofoaga o loo outou faanofoesea ai, aemaise le atunuu atoa. E iai le talitonuga o loo saogalemu nofoaga o lo outou nopia’i ai, ma o loo faatino galuega a alii ma tamaitai fomai faapea ma Malu o le Mālō, ina ia faatumauina pea lo outou saogalemu i lea aso ma lea aso.

E oo atu foi sa matou upu i nai o outou aiga, o matua ma fanau o loo taputapuai mai, ina ia onosai ma mau pea le toovae.  Ia tatou fai tatalo faatasi ina ia manuia lo tatou faamoemoe ua leva ona taumafai mai, mo le malu puipuia o Samoa mai lenei faamai.

Le Atua e, matou faatuatuaina pea Oe, o lo matou Olo maualuga, e le masuesueina lava. O lau Upu matou te faatuatuaina, ‘O ou faalavalava ua matou malolo ai’. O le a tatou felogonai pea.

Ia faamanuia le Atua i le faaiuga o lenei vaiaso.

Ma le faaaloalo,

Agafili Tomaimano Shem Leo

Taitaifono

Komiti mo Faalavelave Matuia ma Faalavelave Faafuasei