Faasilasilaga mai le Faipule o Sagaga 2 mo le Itumalo o Sagaga le Usoga

0
1880

Faasilasilaga mai le Faipule o Sagaga 2 mo le Itumalo o Sagaga le Usoga.

Aso Lua 22 Mati, 2022

Faatalofa atu i le mamalu o lo tatou itumalo o Sagaga le Usoga, o le Nofoalii o le Malietoa, poo Sagaga 2 itumalo faa Palota. Taoto ia tou Sa ma Faiga faale Atunuu, o lea le oo iai se leo o la outou auauna, o Paia lava mai le amataga e oo i le faavavau. Talofa lava!

Ua iai nei si o tatou atunuu i se tulaga ma’ale’ale ma le faigata ona o le faama’i o le Koviti 19 Peitai, a tatou tutu faatasi i galuega faatino a lo tatou itumalo, afua mai i Alii ma Faipule seia paia le fanau iti, e tatou te maua pea le lototele ma le mafanafana i ituaso faapenei, faatasi ai ma le fesoasoani mai a lo tatou Tapaau i le Lagi.

Mo le silafia, e tusa ai ma le faaiuga a le komiti faaitumalo lea ua malilie ai le avea Afega ma nofoaga e faatu ai le ofisa tutotonu mo galuega atina’e a Sagaga 2. E Faasilasila atu ai e faapea,

1) O le aso na galulue ai Alii ma Faipule o Afega e tapena le Faleaoga Tulaga Lua ( Afega Primary School) i Afega lava mo soo se fuafuaga pea a tusa ai ma se fuafuaga foi a le Matagaluega o Soifua Maloloina e faatu ai se Iunite (Unit) e faatino ai suesuega mo le Koviti.

Ua maea ona fesootai atu lo outou faipule i le afioga i le Minisita o le soifua maloloina e tusa ma le fuafuaga mo lo tatou itumalo, ma ua momoli mai foi se faafetai tele a le afioga i le Minisita ona o ia tapenaga uma ua sauni iai lo tatou itumalo.

2) Ua tapenaina foi le Faleaoga e faanofoesea ai i latou ua maua i le faama’i, peitai, a finagalo foi Alii ma Faipule o se afioaga (Malie ma Tuanai) e faaoga nisi nofoaga i totonu o latou lava afioaga o se faiga lelei foi lea, ae ua nofo sauni lava Afega mo soo se ituaso e moomia ai se fesoasoani.

3) O la’u numera lea telefoni (7208413) e fesootai vave mai ai pea moomia se fesoasoani tau le faama’i o le Koviti, aemaise i latou o loo alala i uta i faatoaga.

4) Faamolemole Sui o Nuu (Alii ma Tamaitai) faapea le Komiti faaitumalo. E moomia lo outou fesoasoani ma le galulue faatasi i nei aso faigata. Fesootai mai i lau numera faamolemole. Mo sui o le komiti e lei atoa tui puipui, o la’u fautuaga, malolo lelei mai i lou maota ma tapuai mai, ae taatia mai le galuega ia i matou ua atoa tui puipui e tolu.

Tatou Taufai tatalo ma faaolooloma’au pea i le Atua mo lana puipuiga sili o Samoa i nei aso faigata.

Soifua, o la outou auauna,

Maulolo Tavita Amosa