Ou te faapa’i atu ma le agaga faaaloalo i le paia maualuga o si o tatou atunuu i ona tulaga faalupe. Faamalo le soifua manuia, faafetai le folau i lenei vaiaso o le a mae’a. Ia saga viia le Atua, ona o lona alofa tunoa i si o tatou atunuu.
O le fa’aauauina o galuega ma fa’ai’uga a le Kapeneta i lenei vaiaso, sa lilifa i tulaga masani. I tulaga tau soifua maloloina, sa fa’amaonia nisi o gasegase o le a auina i Niu Sila mo togafitiga fa’afoma’i i lalo o le polokalame o le Samoa Medical Transfer Scheme. Sa lauliliuina foi lipoti mai itutino ‘ese’ese o le Malo, e aofia ai lipoti fa’aletausaga, o tali a le Malo i mataupu lāgā mai e le Komiti o Tupe a le Palemene, ma lipoti o fonotaga sa auai ai Sui o Matagaluega ‘ese’ese i atunu’u i fafo. E fa’apea fo’i i le fa’amaonia o fonotaga fa’alemalo, o le a auai atu i ai Sui o le Malo i le vaiaso fou.
E aofia i nei malaga le usugafono a Samoa i le tauaofiaga a Ta’ita’i o le Pasefika o le a usuia i Fiti i le vaiaso fou. O a’u nei, o le a ta’ita’ia le usugafono a Samoa, ma o le a talanoaina ai mataupu tupito mo le atina’e, ma le saogalemu o atumotu o le Pasefika.
O suiga ogaoga o le tau ua lē utuvā, ma o se luitau pito faigatā lenei ua feagai ma le lalolagi atoa i nei ona po. O lenei vaiaso, ua o tatou molimauina ai le a’afia o Niu Sila i le afā malosi o Gabrielle, ona o matagi mālolosi ma galu afā, fa’apea lologa. Ua faamauina ai le tele o vaega o Niu Sila ua a’afia.
Ua fa’atino nei i le tulaga aloaia fa’alemalo i le Va-i-Fafo le tāpā o fa’amatalaga mai le Malo o Niu Sila e tauala i le tatou Matagaluega o le Va-i-Fafo. Aemaise lava i le tulaga o i ai a tatou tamafanau o lo’o faigaluega i galuega fa’avaitaimi i Niu Sila.
O lo’o feagai nei le tatou Matagaluega o le Va-i-fafo ma Fefa’atauā’iga ma le Matagaluega o Pisinisi, Alamanuia ma Leipa ma nei feso’ota’iga mo le fa’amautūina o le tulaga o lo’o i ai a tatou tamafanau ma lo latou saogalemū.
E tele a’afiaga o le vaega o Niu Sila o lo’o i ai fa’ato’aga o lo’o galulue ai a tatou tamafanau i Hawkes Bay. O isi vaega o Niu Sila na a’afia e aofia ai Northland, Aukilani, Tairawhiti, Bay of Plenty, Waikato ma Tararua.
O lo’o galulue fa’atasi le Sui So’o’upu a Samoa mo Galuega Fa’avaitaimi i Niu Sila, ma Sui o le Matagaluega o Pisinisi ma tulaga tau Galuega a Niu Sila, e feso’ota’i uma o tatou tagata faigaluega fa’avaitaimi, atoa ai ma fe’utagā’iga mo lo latou saogalemū. O lo’o galulue fa’atasi fo’i ma Sui o le Pasefika e fa’atino lenei galuega.
E le’o i ai se lipoti o se tasi o tamafanau a Samoa o galue fa’avaitaimi i Niu Sila ua fa’amaonia le a’afia pe ua maliu fo’i i lenei fa’alavelave, ma o lo’o mata’itūina pea i le taimi nei lea tulaga.
O le mea lea, ia to’a pea le atunu’u, aemaise lava i mātua ma aiga o tamafanau a Samoa o lo’o galulue fa’avaitaimi i Niu Sila. O lo’o fa’agasolo nei galuega ma feso’otaiga ma le Malo o Niu Sila i vala uma mo le fa’amautinoaina o le saogalemū o a tatou tagata faigaluega.
Ua fa’amaonia fo’i e le Kapeneta i lenei vaiaso, le fa’agasologa o tapenaga mo le talimalo ai o Samoa, i le fono tele a Taitai o Malo o le Taupulega, lea o le a usuia i Samoa nei i le tau fa’ai’uga o le tausaga fou 2024. O le lona 26 ai lea o fonotaga talu mai le ulua’i fono i le 1971.
E pei ona mua’i faailoa atu i le atunuu, o le ulua’i taimi lenei ua tusi aao ai Taitai o Malo o le Taupulega e usuia i Samoa nei lenei fono tele. Ma o le taimi muamua foi lea, o le a usuia ai lenei tauaofiaga i le Pasefika, ma talimalo ai se atumotu laitiiti. E 56 atunuu o loo i le li’o o Malo o le Taupulega, ma o le fono muamua lenei a lana Maiesetete – le afioga i le Tupu o Peretania – Salesa le III, ma o ia o le Fa’atumutumuga o le li’o o Malo o le Taupulega.
Ua mae’a le asiasiga muamua na malaga mai ai Sui o le Ofisa o Malo o le Taupulega a Peretania (Commonwelath Secretariat) ia Novema o le tausaga na te’a nei. Sa asia ai le tatou malae vaalele, fale o lo’o fa’amoemoe e fa’atino ai le fonotaga, fa’apea fe’utagā’iga na faia i le fausia o se ‘au’au po’o le sini o le fono. Sa mātauina le fa’amalieina o le asiasiga i tulaga o lo’o i ai la tatou malae va’alele fa’avaomalo, ma tatou fale ua fuafua mo le fonotaga.
Ua fa’amaonia le fa’agasoloina o galuega a le Komiti o Tapenaga mo le fonotaga. O lenei Komiti e gafa ma le fa’amautūina o vaega tau i le puipuiga ma le saogalemū o Taitai o Malo ma a latou usufono o le a auai mai. E fa’apea fo’i i le fa’amautūina o nofoaga, apitaga, femalaga’iga, tapenaga o le anofale o le fono ma tulaga tauāloa, feso’ota’iga ma le tu’uina o fa’amatalaga, auaunaga fa’alesoifua maloloina, vaega o tupe, atoa ai ma le tali atu i fa’alavelave fa’afuase’i.
O vala tāua uma nei o le tatou tapenaga, ma o le a i ai se Vaega fa’apitoa e fa’atūina i totonu o le Matagaluega o le Va-i-Fafo ma Fefa’ataua’iga e feagai ma le tuliutliloaina o nei galuega uma.
O le Komiti ua faatuina nei, e aofia atoa ai itutino o le Malo, ma e faapea foi ona moomia ai le fesoasoani a le vaega tumaoti ma pisinisi, o afio’aga ma alalafaga e pei foi ona o tatou talimalo ai i fonotaga tetele sa usuia i Samoa nei, e pei o le fono a Malo lāiti o le lalolagi i le 2014.
Samoa e, matou te talitonu, e maopoopo ma mapo a tatou tapenaga uma mo lenei fa’amoemoe, ina ua o tatou galulue faatasi ma feoeoea’i.
Ae tatou fa’alagolago ma fa’atuatua i le Atua, e ‘au ma i tatou, tatou te mafaia ai mea uma, e ala i le ta’ita’iga a lona Agaga Paia.
Tatou tatalo pea ma le fa’atuatua, e le tu’ulafoaina tatou e le Atua.
Ia manuia lau tapuaiga Samoa. Ia malutia pea si o tatou atunu’u e aao fa’aola o Iesu Keriso.
(1)
