Faasilasilaga mai Afioga i le Tamaitai Palemia o Samoa Aso Faraile 18 Mati 2022

0
59

E faatalofa atu i le paia o le atunuu I lenei afiafi mai ona ao, seia oo atu i se ua aupito itiiti. O lenei ua iu lenei aso, a o loo maualuga pea le agalelei o le Atua. Ia faamanuina lona Suafa Paia, ma faafetaia lona alofa lēmavae mo Samoa.

Ua silafia e le atunuu tulaga ua iai nei lo tatou puipuiga, ma le sao mai i tua o le faamai, na afua mai ananafi. O loo faaauau pea galuega a le Matagaluega o le Soifua Maloloina ma le Komiti o Faalavelave Tutupu Faafuasei i le taimi nei, ma o le tulaga ua mautinoa, ua faaopoopo le numera o i latou ua aafia i le faamai. O le afiafi nei, ua faamaonia ai ua sefulutasi (11) i latou ua aafia i le siama talu mai anapo, ma faanofoesea nei latou i nofoaga faanofoesea ua tapenaina.

O le tulaga lea ua maitauina o loo tupu i atunuu uma o le lalolagi ua aafia i le faamai, ona o le vave o le pipisi. E taua ai le sao o le atunuu atoa, fesoasoani i le tau taofiifia ole pipisi o le faamai, e ala i le mulimulitaia o aiaiga ua faatulagaina mo laasaga o le puipuiga

I le se’e atu ai o le atunuu i le laasaga 3 e afua atu i le vaeluaga o le po nei, ua faamaonia ai aiaiga o vavao ua faataoto mo le puipuiga o le atunuu. Peitai, e iai vaega ua fetuunai ona o le faatauaina, o le maua pea e le atunuu o auaunaga moomia e pei o taumafa ma vaiinu, auaunaga tau faletalavai, suauu ma penisini, auaunaga tau kesi mo gasesega, ma isi vaega taua ua faatulagainaa o tatou iai i le laasaga 3. Ua faaiugafonoina ai e le Kapeneta, le tatalaina o nei auaunaga mai i le itula e 8.00 i le taeao ae tapunia i le 2.00 i le aoauli. O lenei fuafuaga e faatino i le Aso Toonai (19 Mati), Aso Gafua (21 Mati), ma le Aso Lua (22 Mati). O le Aso Sa (20 Mati) e tapunia uma ai nei auaunaga.

I lalo foi o le laasaga 3, ua uunaia ai le faaaoga o auaunaga i totonu o sone ua faatulaga, e aofia aiafioaga ma nofoaga o loo papa aao ai le atunuu, mo faatauga  i faleoloa, ma auaunaga moomia, ina ia taofia ai le soona feoai. O le taua o lenei fuafuaga, ina ia mafai ai ona tau taofiofi le pipisi vave o le faamai, a o taumafai le Matagaluega o le Soifua Maloloina e faatino galuega faasoifua maloloina uma mo le puipuiga.

O le tatou mau e masani ai a tatou faiganuu, e malu afioaga i le Pule mamalu a Alii ma Faipule. Ou te talitonu o vavao masani a Afioaga i aso taitasi,  o le afesoasoani tele i le taofiofia o le soona feoai ma le faapotopoto i vaega eseese o Nuu. E faapea foi i Komiti a Tina mo le faatumauina o le tumama lautele o aiga ma afioaga.

O lea lava ua sao mai i tua le faamai. I lenei taimi umi na faatino ai le tatou puipuiga, sa iai lava le manatu, ele alofia ma e iai le taimi e sao mai ai i tua le faamai. Lea ua o tatou i ai nei. Peitai, e faalagolago le tatou tali atu, i lo tatou talia o le tulaga ua tupu mai, ma o tatou taumafai faatasi e tauave lo tatou puipuiga. O la tatou fesoasoani lava lea mo le tausoaina faatasi o la tatou avega.

Le atunuu e, ia tatou maua pea le to’afilemu, ma faatuatuaina pea le mana faamalolo o lo tatou Atua, o lo tatou ala lea i malo. Ia manuia le faasausauga a si o tatou atunuu i lenei po.

SOIFUA