Faasala se Talavou i le Falepuipui mo le Avetaavale Faatamala ua Mafua ai le Oti

0
163
The Supreme Court side of the Mulinuu Courthouse.

O Aniseko Metini, o se alii talavou e 20 tausaga le matua, ua faasalaina nei e le faamasinoga mo le 13 masina e nofo sala ai i le falepuipui i Tanumalala, ona o le ave taavale faatamala, ua maliu ai lona uso o Juel Tofilau Lafo Fina’i, 19 tausaga le matua.

O Aniseko ma Juel e uso, peitai, na vaetamaina (adopt) e le uso o le la tama Juel ao pepe o ia.

O le tina ia June sa vaaia i le potu faamasino. O Juel o si ana tama sa ia tausia mai lava ao pepe ma latou agai ai loa i atunuu i fafo.

Peitai, o se la malaga asiasi mai i Samoa lea sa maliu ai loa si ana tama i lea faalavelave.

O se maliu na faia i Nofoalii – o le tama o le toalua o June poo le grandfather o tamaiti – lea na alu ai  loa Juel e fesoasoani ia Aniseko i a la feau.

O le agai ai o le taavale i le faatoaga i le aso 4 Mati o le tausaga nei lea sa tupu ai le faalavelave. O se faiga fafie na o ai, peitai, o le saoasaoa tele o le taavale lea sa mafua ai lenei faalavelave. Sa maliu Juel, ae faaman’ualia ai Apelu Tile, o se alii 21 tausaga sa malaga faatasi ai i le taavale.

I le tolaulauina o le faaiuga i le famasinoga maualuga na finauina ai e le itu a leoleo le amata mai lea i le 3 tausaga ma le ono masina se faasalaga faafalepuipui. Peitai, na finau mai foi le tamaitai loia o loo tulai mo Aniseko, Diana Roma, e talosagaina le faamasinoga mo se faasalaga tupe poo se isi lava faasalaga, ae aua nei iai se faasalaga faafalepuipui.

Sa faamautu mai le silasila a le Faamasinoga, e alagātatau ona tuuina atu se faasalaga faafalepuipui, e amata mai le tolu tausaga.

Ae lei tuuina mai le faaiuga a le faamasinoga, na silasila le tamaitai faamasino i itu ogaoga o lenei faalavelave faapea foi ma ni itu lelei mo lē ua molia, auā le fetuutuunaiga o le faasalaga e tusa ma alafua faataatia o le Faamasinoga.

Itu ogaoga o lenei mataupu

* o le maimau ai o le ola o lē ua maliu.

* o lē o loo molia, o loo iai moliaga na molia muamua ai.

* ogaoga le faalavelave, ua maimau ai le ola.

* aafiaga o i latou na aafia.

Itu lelei

* sa taumafai e ave ese mai lona uso i le taimi o le faalavelave

* ua ma’ea ona faatino le ifoga ma fesoasoani mo le lauava

* e laititi tausaga o lē ua aafia, ma ua salamo moni foi o ia

* ripoti ua suia lona mafaufau

* sa ia vave ioeina moliaga, e lei tau faia ai se faamasinoga iloilo

I le tuuina mai la o le faaiuga sa toesea ai le 7 masina mo le maea ai ona faatino le ifoga, 7 masina mo lona vave ioeina o le faalavelave, 1 le masina toesea ona o lona lava uso, 4 masina toesea ona o faamaumauga a le ofisa paloloa – ua tele se suiga o le olaga.

“Ma le 3 masina toesea ona o le laititi o ou tausaga, ma le 2 masina toesea i lou salamo, ma le 1 o le masina, ona o lou lava uso lea na maliu..”

Faasalaga

* Ave taavale ua mafua ai se maliu, e fitu masina e nofo sala ai le fale puipui

* Ave taavale faatamala ua mafua ai manuaga tu’ga, e ono masina e nofo sala ai le fale puipui

* Ave taavale e aunoa ma se laisene ua faamaonia ae faapafala se faaiuga a le faamasinoga.

O le tuufaatasiga e 13 masina e nofo sala ai i le falepuipui, e tuli faatasi ia faasalaga ae o le a toesea mai aso sa e nofo taofia ai.

O Aniseko ma Juel e uso, peitai, na vaetamaina (adopt) e June ma si ona toalua, ao laititi. O se faalavelave sa faia Nofoalii (maliu) o le tam’a o le toalua o June lea na faifeau ai Aniseko ma Juel, lea na faifeau ai ma agai ai le faatoaga I le aso 4 Mati, o se faiga fafie na o ai peitai o le saoasaoa tele o le taavale lea na mafua ai lenei faalavelave ma maliu ai Juel, ae man’ua ai Apelu TILE, o se Alii 21 tausaga na Malaga faatasi ai.

Na faailoa Luma o le faamasinoga o Aniseko Metini o loo iai foi se isi moliaga sa tulai ai foi o le talepe fale ma le gaoi, ae mo Apelu TILE na faailoa Luma o le faamasinoga ua leo toe aoga se feau, ona o manuaga sa aafia ai.

O le ma’ea ai o le faamasinoga na vaaia ai le maligi o loimata o matua o Aniseko ma faamavae atu ia Aniseko, ae mo June na fesiligia ae tali, e leo fiafia I le tulaga o le faaiuga o le toese, o masina e pei ona tolaulauina ai le faaiuga.

O le afioga le tamaitai faamasino Tafaoimalo Leilani Tuala Warren sa gafa ma lenei mataupu.