E toavalu nisi o le aufaigaluega a le falepuipui i Tanumalala ua faia iai le faaiuga a le Matagaluega o Leoleo, Falepuipui ma le Ola Toefuataina, ina ua mae’a se iloiloga ma maua ai o le faatamala o le faatinoga o tiute le mafuaga na sosola ai i tua pagota.
O Lauititi Tualima ma Aniseko Vaelei na sosola ia Ianuari, ae toe maua ma toe tuuina atu i le toese i le masina o Mati 2025. Peitai, o le Aso 30 o Me 2025 na toe sosola ai foi i tua la’ua lava lea e toalua.
O le Aso 2 o Iuni a’o alo atu le atunuu mo le sisigafu’a, na toe maua uma ai Lauititi ma Aniseko e leoleo, i osofai’ga a leoleo i Vaimoso ma Ululoloa, lea sa taitaia e le Sui Komesina ia Leiataua Samuelu Afamasaga.
Ua faailoa e le Komesina o Leoleo, le tofā ia Auapaau Logoitino Filipo, sa faatino suesuega a le Matagaluega (internal investigation) e saili ai le mafuaaga o le sosola ai i tua o pagota.
Saunoa le Komesian, o Ofisa Leoleo o le Falepuipui sa tiute (on duty) i lea po, e le’i iai i Tanumalala i le taimi na sosola ese ai i tua pagota.
“Na maua i suesuega, na sosola pagota i le afiafi i le taimi tonu o faigalotu, ae e le’i iai leoleo ofisa na tiute i lea taimi, ua leva na latou tu’ua le nofoaga o le toese.”
E toatolu i latou ua faamuta a latou galuega (sacked) e aofia le Taitai o le tiute (command) ma le Sui Taitai (second in command) ma le isi alii ofisa e sosoo atu iai lona tulaga.
E toalua leoleo ofisa o le falepuipui na faamalolo mo vaiaso e lua, ae aunoa ma se totogi (suspended without pay), ae toatolu leoleo ofisa ua faapa’ū i lalo o latou tofiga poo tulaga i totonu o le toese (demoted).
Faailoa e le Komesina, na iloa lelei e Lauititi Tualima ma Aniseko Vaelei e le o ola masini pueata o le toese, atoa ma le silafia lelei e alii pagota ua le o iai se alii ofisa leoleo o le falepuipui i lea taimi o le afiafi.
O le isi itu na ta’ua e Auapaau, o potu na faaletonu ae le’i faailoaina ifo i le Pulega o le Falepuipui.
O Lauititi Tualima 32 tausaga o Satapuala ma Luatuanuu, o loo tuli ona faasalaga i le mau moliaga e aofia ai le faamalosi teine, gaoi, talepe fale, ulufale faamalosi e aunoa ma se faatagana, sola ese ma le toese, ma le faaoolima tugā.
Ae o Aniseko Vaelei 28 tausaga o Vaiusu ma Aele, o loo tuli foi ana faasalaga i moliaga o le taumafai e faaoo le oti, faaoo lima tuga, gaoi, talepe fale, ma le sola ese mai le falepuipui.
Ua faailoa e le Komesina o Leoleo, ua mae’a ona toe faaleleia potu sa faaletonu, faapea le toe faaola o masini pueata. Ua tuuina atu foi e le Matagaluega nisi o Malu o le Malo e fesoasoani i le nofoaga i Tanumalala mo le puipuiga i lenei taimi.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
