Ua faasala i le falepuipui se tagatanuu o le Malo o Fiti ina ua faamaonia lona moliaga o le uumia o le fualaau faasaina o le aisa.
O Rupeni Luvu 53 tausaga ua faasala mo le ono masina i Tanumalala.
I le fofogaina o le faaiuga a le afioga ia Leaiataualesā Daryl Clarke, “E le mafai ona tuu avanoa le faamasinoga i soo se isi lava e molia pe aafia i fualaau faasaina tusa lava poo se tagata e i fafo atu ma Samoa.”
E lua tausaga na talosaga ai le itu a leoleo e amata mai ai le fua a le faamasinoga peitai e 18 masina sa amata mai ai le alii faamasino.
Naa toesea nisi o masina ona o itu lelei, e aofia ai le salamō e ala lana faatoesega, vave ioeina lea o moliaga ua faasaoina ai le taimi le faamasinoga, atoa ma le tulaga lona soifua maloloina, totoe ai le ono masina e nofo sala ai le falepuipui.
O le masina o Fepuari na malaga mai ai Rupeni Luvu mai Amerika Samoa ma ia afea ai le malae vaalele I Faleolo ma le faamoemoe e pue ai le isi vaalele e malaga ai mo Niu Sila peitai, o le siaki masani le aufaigaluega le ofisa tiute I Faleolo lea na ma’ua ai o loo ia umia le pauta faasaina le aisa ma logoina ai loa leoleo mo latou suesuega.
E 0.63 kalama le mamafa o le pauta o le methamphetamine sa ia umiaina.
Na vave ona ia ioeina moliaga le itu leoleo e tauala mai lana loia Arther Lesā.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
