Na fa’apai’a e lana Afioga Akiepikopõ Alapati Lui Mataeliga o le ta’ita’i o le Ekalesia Katoliko i Samoa le malumalu o Maria Imakulata i Levī Saleimoa i le vaiaso nei.
Na saunoa le teutupe o le Ekalesia, ia Pesetā Mafuli Sapa’u e faailoa le tala o le galuega ma ia tā’ua ai e tusa ma le $130,000 le tupe sa maua lava i Samoa nei i matafale aulotu e fasefulu (40).
E silia ma le $500,000 na mafai ona tauaaoina mai e alo ma fanau o le Ekalesia mai Aukilani Niu Sila, ma Sini Ausetalia.
E $300,000 le aitalafu mai faletupe sa faauma ai le galuega lea sa gafa ma le Era Construction.
O loo fausia lava le malumalu fou i luga o le fanua mautietie sa iai le falesā muamua.
I le taulaga paia o le Misasā sa faapaia ai le malumalu fou na saunoa ai Akiepikopõ Alapati Lui Mataeliga i le taua o le vaitau lenei ma le galuega a Ioane le papatiso na sau ai i le lalolagi e fai.
Sa ia faafetaia le Ekalesia i Levī ona o le galuega matagofie, peitai o le feau sa faamamafaina e le Akiepikopõ; o le tāua o tagata i Le Atua.
“E ui la i le matagofie o lenei galuega ae aua ne’i sili atu le fale nei i lõ le fale lenā; o oe ma a’u…e afio ai Le Alii.”
Sa ia saunoa foi i le Ekalesia ina ia tutū faatasi ae aua le fevaevaea’i.
“A malosi ma fealofani outou, ua malosi fo’i le Ekalesia, ae po’o le ā le to’atele ma le maua o mea..ae a fe’aina’i, ua tatou faavaivaiina le Ekalesia, o le tino o Keriso..”
O le aao foai o le auvalaaulia i lea aso o le a fesoasoani i le totogiina o le aitalafu o loo totoe, peitai e le tuuina ai lava sē loto feaoasoani atu.
E pei ona saunoa Peseta, “O ai ua mū le loto e fia fesoasoani mai, e talia ma le fiafia e le aulotu”.
