I le lipoti lata mai a le Matagaluega o Soifua Maloloina, ua fa’amaonia mai ai e to’a 129 i latou fou ua fa’aopoopo i le mamalu o le atunu’u lautele ua a’afia i le siama o le Koviti-19.
Ma ua si’itia ai i le 1,493 i latou ua a’afia i le atunu’u lautele talu ona pepesi i tua le fa’ama’i i le Aso 17 Mati 2022. Peitai, mo le taimi nei ua na’o le 1,330 i latou o lo’o a’afia pea. O lona uiga, e 163 i latou ua toe faafoisia le malosi mai le faamai.
E leai foi nisi o loo tigaina i le falemai, ae ua toatele lava ina faanofoesea lava i totonu o aiga, ma tausi ai ma toe malolosi ai le mamalu o le atunuu.
Ua tau ina atoa le mamalu o le atunuu ua maea a latou tui e lua (double vaxxed) ae o le vaiaso nei e faasolo ai tuiga lona tolu poo le booster shot. O le Aso Tofi mo Upolu ae o le Aso Faraile mo Savaii. E fai ai foi ma tui a le fanau I lea foi faamoemoe, aua o lea ua lava ma totoe tui o le Pfizer sa faapea na taunuu mai i le vaalele i le Aso Lua (ananafi).
O le 97% poo le 1451 o ē ua a’afia mai le mamalu o le atunu’u lautele, o lo’o nonofo i Upolu ae o le 42 o lo’o aumau i Savai’i ma o lo’o tumau pea le malu puipuia o Motu o Manono ma Apolima, e aunoa ma se tasi ua pesia.
O lo’o fa’amauina fo’i e le Matāgaluega o le Soifua Mālōlōina e tusa ma le 56% o e ua a’afia o tama’ita’i a’o le 44% o ali’i.
Silasila i le kalafi o lo’o tu’uina atu i lalo ifo, o lo’o fa’ailoa manino mai ai o le 15 tausaga e agai atu i le 35 tausaga o lo’o mafuli ai i latou o lo’o a’afia. Peitai o loo maualuga le numera oi latou ua a’afia i le fa’amai mai i le 35 tausaga e agai atu i le 55 tausaga le matutua.
O loo iai le fanau its ei lalo mai o le 4 tausaga. E lei iai se tui mo i latou mo lenei taimi, ae peitai, e le o iai lava se pepe o lipotia mai o tigaina. O loo faamalosia foi tina e faasusu pepe, ae tautuaga tali fofoga ma le tumama e aua ai nei aafia o ia.
Ua fa’amaonia fo’i e le Matāgaluega o le Soifua Mālōlōina e 18,010 su’ega – (RAT Tests) sa faia talu mai le aso na mua’i pepesi ai tua le fa’ama’i.
(0)
