Faaopoopo Faamanuiaga mo i latou e iai aafiaga tumau o le soifuaga

O se itu, na saunoa le Minisitā, ia avanoa tutusa tagata uma i fa’amanuiaga e sasa’a atu e lo tatou Mālō. A’o se ‘ai fo’i lea e pine fa’amau ai le amana’ia e Samoa o le Feagaiga Fa’avāomālō mo i latou e i ai a’afiaga tumau o le soifua e pei ona sainia ai i tausaga ua mavae..

0
865

Tusia: Pesetā Tusiga Taofiga, Sooupu a le Malo. O le tala fua o fuālā’au ma vailā’au fa’atasi ai ma le malaga fua i luga o va’a i le va o Upolu ma Savai’i o i latou e i ai a’afiaga tumau o le soifua, o se fuafuaga ua tapena i ai le Mālō ina ia fa’atino ae le’i mae’a lenei nofoā’iga.

Ua fa’ailoa manino e le Afioga i le Minisitā o le Matāgaluega o Tinā ma Tama’ita’i, Atina’e o Nu’u ma Agafeso’ota’i iā Mulipola Anarosa ‘Ale – Molio’o i le feiloā’iga ma le Savali, ua tapena le Mālō e fa’atino le isi vaega o fa’amanuiaga mo nai o tatou tagata e i ai o latou a’afiaga tumau o le soifua.

Mo le silafia, ina ua tula’i mai le Faigāmālō a le Fa’atuatua i le Atua Samoa ua Tasi (F.A.S.T.), o le isi vaega lea o le latou anavatau, ina ia maua fa’amanuiaga mo e i ai a’afiaga tumau o le soifua.

O le ala lenā na ta’oto ai le ta’i $100 sa fa’amatu’u atu i masina ta’itasi mo i latou e i ai a’afiaga tumau o le soifua.

Peita’i ua lē muta ai i lea le alofa tula’i o le Mālō, e pei ona fa’ailoa e Mulipola, le tapena ai o le Pepa i le Kapeneta, auā le talosaga mo le fa’alautele atu o lea fa’amanuiaga, ina ia mafai ona tala fua e aunoa ma se totogi fuālā’au ma vailā’au o i latou e i ai a’afiaga tumau o le soifua, fa’atasi ai ma le malaga fua e aunoa ma ni pasese i le va o Upolu ma Savai’i.

O se itu, na saunoa le Minisitā, ia avanoa tutusa tagata uma i fa’amanuiaga e sasa’a atu e lo tatou Mālō. A’o se ‘ai fo’i lea e pine fa’amau ai le amana’ia e Samoa o le Feagaiga Fa’avāomālō mo i latou e i ai a’afiaga tumau o le soifua e pei ona sainia ai i tausaga ua mavae.

O le taimi nei, fa’ailoa e Mulipola, e i ai aiaiga ma ta’iala o lo’o fa’atulaga e le Mālō, ina ia ‘aua ne’i fa’aāoga fa’alētatau e nisi, lea fa’amanuiaga tāua o le ā fa’agasolo e lo tatou Mālō.


Tusiga Taofiga