Ua laga le mataupu o seila Samoa i lenei vaiaso atoa talu ona silasila le lalolagi i le ata video sa pu’eina e le Afioga Taulapapa Pao Sa’ale, ma le aioi mai i se fesoasoani a lo tatou atunuu i lo latou faafitauli, ua fia fo’i mai i Samoa nei.
Sa faailoa fo’i e lea tamalii ua le toe maua ni a latou totogi, ma ia umia se tusi ma faapea mai o le tusi na tuuina atu e le Faalapotopotoga o Auaunaga o Va’a a Samoa, ma ia faauigaina ua tuulafoaiina i latou ma le mananao Samoa e latou te toe fo’i mai.
Peitai i se saunoaga a le Ofisa Sili o Pulega o le Faalapotopotoga o Auaunaga o Va’a a Samoa le Afioga ia Lautimuia Afoa Uelese Vaai i se faatalanoaga i le amataga o le vaiaso nei, sa ia taua ai o Taulapapa e lei atoa le 2 masina talu ona malaga atu, ae tulai mai ai loa se faalavelave sa tupu mai i luga o le vaa lea o le Armonia lea sa galue ai.
“O le susuga ia Taulapapa, faatoa malaga atu ia Ianuari e amata ai lana konekarate, ae poo se mea o Fepuari poo Mati, na aumai ai le ripoti mai le kamupani ua iai le faalavelave ua tupu i luga o le va’a. Ua faao’olima le Susuga Taulapapa Pao i le Posini, poo le supervisor – o le leading hand lea i luga o le va’a, o le Posini Italia.
Na faia le faaiuga a le Kapeteni, o le a faamuta le auaunaga a Taulapapa ae sei faia le suesuega, e maea ane la le suesuega lea, ma faamaonia ai le faaoolima a Taulapapa. E tau toe faafoi loa i Samoa, ae lockdown loa ma malaevaalele, ma atunuu uma i le faamai.”
E 12 seila Samoa o loo iai i luga o le vaa laupasese a le kamupani o le MSC le Armonia lea o loo iai Taulapapa. E toatolu o lo’o galulue pea i le taimi nei, o isi o lea numera ua maea konekarate ma o loo tausi ai pea i luga o lea va’a. Ae na o Taulapapa Pao Sa’ale lea ua faate’aina lana auauanaga ona o le faaolima lea ua faamaoniaina.
Ua vevesi le social media i lenei vaiaso atoa ma le toatele o nisi ua tuuaia le auaunaga a le SSS.
Sa tā’ua e le Pule Sili o loo fesootai lava i aso uma i Kamupani vaa aua le saogalemu o alo ma fanau uma, ma o loo fesootai atu foi lea i tatou seila e aumai ai le faamaoniga o la e lelei le tausiga o latou.
Saunoa le Pule Sili o mea ia e tilotilo iai i le saogalemu, ona e le o nonofo taitoatasi o la e toatele latou o loo iai faatasi, lelei tausiga i meaai, ma sefe potu o loo nonofo ai.
Na taua e Lautimuia e tele itu sa tagai iai le Malo faapea le Faalapotopotoga o Auaunaga o Vaa a le atunuu, ona o nisi fo’i o lo tatou atunuu o loo iai i le tulaga lava lea e tasi i atunuu i fafo, o loo taofia uma lava i le tapu lea.
“Na pau lava le itu sa tilotilo iai o le mautinoa o la e saogalemu le nofoaga o loo nonofo ai ma tausi lelei – o le itu lena o lea e ave iai le faamuamua”.
Ua maitauina le faaleo mai o ni popolega o le toalua o le seila o loo taofia e leoleo, faapea le toalua o Taulapapa. Ua tulai mai foi le SSIG e unaia le Malo e toe faafoi mai seila, e tusa ma le video aioi mai a Taulapapa. O loo iai foi se video a King Faipopo i lenei lava mataupu ma faapea mai o loo fai o ia ma se leo mo i latou ua leai se lei.
(1)
