Faaoo atu ma Taliaina i le Faatamalii le Sāvali Filemu a Nisi o le Atunuu

0
1228

 

E lata i le 100 sui o le atunuu mai alalafaga eseese i totonu o Samoa na auai atu i se solo taavale sa agai i le Malae i Tiafau i le taeao ananafi.

O le faamoemoe sa iai e faailoa lo latou teena o pili e tolu lea e iloilo ai le Faavae o Samoa atoa ai ma teuteuga i le faatulagaina o le Faamasinoga o Fanua ma Suafa. E tusa ai ma aiaiga masani o teuteuga o tulafono i Samoa, o lea ua i aao o le Komiti Faapalemene mo le 90 aso, e latou te taliaina ma iloiloina ni mau ma se finagalo o soo se tasi o le atunuu, e fia molimau.

O le Afioga ia Afamasaga Tamanana Uelese Tasolo sa fai ma fofoga o le solo e momoli le mau latou te teena tulafono o loo i luma o le Komiti i le taimi nei.

Afioga ia Afamasaga Tamanana Uelese ma nisi o sui auai o le savali.

“O le ala lea ua matou savalia ai ala o le mativa, matou tutulai ai e faaali le mau a Pule ma Tumua na maua ai le saolotoga o Samoa, lea ua matou tuualalo atu i le paia o le faigamalo, o le ala tonu ua matou savavali mai ai. Matou te omai e lagolagoina la outou galuega, ma ia lagolagoina la matou mau ia soloia tulafono, e ogaoga, e matautia.”

O le tali mai a le Komiti sa alagaina e le Afioga i le Gafatasi ia Fuimaono Sam Te’o. Sa ia faafetaia ai le tofa i tupu ma tamali’i o le atunuu na oo atu, ma le tali mālū ia taatia atu le fanoga o le solo filemu.

“A’o lo outou afifio mai, se faafetai, ua le tuua lo tou tiute fai o matai o nuu, o matai e tausi aiga, leaga e te puipui o au measina, o le ala lea o le toe tatala atu o le avanoa, e aumai le tofa, aumai le faautaga, ma le tuualalo i le paia o le atunuu. Aisea? O le tataou sā tatou te iai uma i totonu, e iai le manatu, a goto, goto lava ia Samoa”.

Afioga i le Gafatasi Fuimaono Sam Te’o, Sui o le Komiti Faapitoa a le Palemene.

“Lafo mai le faamoemoega, o lea ua māua ma sāua i le va lo tou finagalo, o le sae lena o faigamea. O le aga ga faa Samoa. Le faafesagai o kupu ma kamalii. Avakū aumaī, ma kakou kilokilo i se mea e maua ai le filemu ma le fiafia o kagakuu o Samoa.”

O le mau a nisi sa auai i le solo e pei o le alii tupulaga talavou, o Atatagi Togifa’i mai Faleata na ia faapea mai ai na ala ona oo mai e lagolago, ma ave se tuualalo i le malo i ni nai vaega e le o fetaui ai le tulafono.

Atatagi Togifai, Faleata.

“O le tulafono lea i le aiaina o faaiuga fai a aiga, e pei ona faatulaga mai ai le 5 o matai sa’o, ou te manatu a’u ia e le’o fetaui lea tulaga”.

O le tama o Vaotuua Michael Toevai mai Afega o loo faapea mai ua lava ma totoe mau a le Sosaiete a Loia faapea foi le Sui Faamasino Sili.

Vaotuua Michael Toevai

“O lea ua manino ai le mata o le vai ma o le mafuaaga tonu lava lena o lo matou tete’e ia maua se manuia o Samoa.”

E lei iai se mau tusitusia a e na auai atu i Mulinuu i le aso ananafi. E faapea o le a maua i le Aso Lulu o le vaiaso fou. O le aso lea o le a feagai ai segaula i le va o le Komiti ma sui o lea solo pe a momoli aloaia la latou mau e teena tulafono taufaaofi ua i luma nei mo le suesuega a le Komiti Faapitoa a le Palemene.


Maina Vai