27 Ianuari 2021, Apia Samoa. Ua faailoa mai e le Alii Palemia Susuga Tuilaepa Dr Sailele Malielegaoi i lana polokalame ma le TV3, le faanofoesea ai o se tagata se toatasi mai le aumalaga lea na taunuu mai i le Aso Faraile o le vaiaso na mavae nei, ina ua masalomia ai auga o le faama’i o le Koviti-19 i lana suesuega lona lua.
E lei auiliili mai e le Alii Palemia lenei mataupu, peitai, sa ia faapea mai e leai se mea o le a faapopoleina ai le atunuu i lea tulaga, aua e le o iai se fesootaiga a la au malaga ma le mamalu o le atunuu.
Sa toe faamautinoa mai e le Alii Palemia e taipei lava foi o le tulaga na iai nisi o aafiaga lea sa masalomia muamua ai fo’i nisi, ina ua faatino a latou suesuega ma maua ai, o i latou sa maua i le faamai i ni masina ua tuanai (historical case).
Saunoa le Alii Palemia “O lona uiga e leai se tulaga e faaono popole ai le atunuu…
“O lea lā ua tuu ese ae mataitū…ae matuā leai lava la ni auga o le faama’i”.
E ui e le’i faailoa mai e le Alii Palemia poo se seila lea ua aafia pe leai, peitai, o se molimau maumaututu a le Samoa Global News sa ia tā’ua; o se alii seila lea ua faanofoesea. Sa quarantine faatasi ma nisi o lea aumalaga i le faletalimalo o le St Therese i Leauva’a, ae o lea ua aveesea mai nei mo le faanofoesea ae sei mataitu e pei ona saunoa iai le Alii Palemia.
E tusa ma le 257 le pasese a le Air New Zealand i le malaga e toe faafoi mai ai o tatou tagata aemaise o alo ma fanau a Samoa sa galulue i luga o meli la’upasese ma va’a la’u oloa lea na taunuu mai i le Aso Faraile na mavae nei.
O le 218 o lea pasese, o alii seila ma o ni alo ma fanau o le atunuu ua tele masina o loo nonofo i luga o vaa ina ua maea a latou konakarate, ae poloka loa femalagaiga ona o le Koviti-19.
(3)
