Ua tuuina mai se faasalalauga faalauaitele a le afioga i le Palemia ia Fiame Dr Naomi Mataafa, e faamuta aloaia ai le tofiga o le afioga ia Laauli Leuatea Polataivao Fosi, o le Minisita o Faatoaga ma Faigafaiva.
E 10 miloaga faasaga i le afioga ia La’aulialemalietoa Leauatea Polataivao Fosi Schmidt, sa faataunuuina i le Aso Faraile 3 Ianuari 2025.
E 3 moliaga o le ufiufi o le amiotonu, 3 moliaga o le faia o faamatalaga sese, 2 moliaga o le lalafo o upu faifai, 1 le moliaga o le taumafai e faatino le solitulafono, 1 le moliaga o le lalafo o upu faaso’esa i luga o upega faatekolosi.
Peitai, ua saunoa Laauli o ia fo’i o le Taitaifono o le vaega faaupufai o le FAST, o ia e mamā mai tuuaiga uma, e tusa ai ma moliaga ua faasaga ia te ia, ma e iai le taimi e faailoa ai le mea moni (the truth will be revealed).
Sa faasalalau faalauaitele fo’i e Laauli i le po o le Aso Tofi, e na te lē o finagalo e faamavae mai lona tofiga faa Minisita.
“Faamalulu atu Samoa i nei tuuaiga ua ou aafia ai. Ae ole tautinoga male faamaoni e mama au ma nei tuuaiga uma..
“Tatalo pea ile Atua ina ia lata mai se taimi e faaalia ai Lana Amiotonu i lenei mataupu ua ou aafia ai..
“Ma o le tulaga fo’i lena ua ou fa’aalia manino i le Tama’ita’i Palemia ou te le faamavae..
“O le a lava le fa’aiuga e tuuuina mai e le Tamaita’i Palemia, ua ou sauni e talia ma tapena ai loa isi laasaga mole lumanai.”
I le faasalalauga faalauaitele a le Palemia i le asō, ua ia tā’ua ai, e le faifogie le faaiuga, ae ona e iai aafiaga o le Malo, ona o le tofiga fa’aminisita.
“O loo aiaia i le Faavae o le Malo Tutoatasi o Samoa ala faa-le-tulafono e faafoe ai tofiga taualoa o le Pulega Faatonu. E faapea foi ona faatulaga ai ma aulape mo nei tofiga ina ia faatumauina pea i le amio sa’o (integrity) ma le tauleleia.”
Ua tuuina atu le faasalalauga a le Palemia i lona atoaga i lalo nei:
O le aso, 10 lanuari 2025 ua faamuta aloaia (terminate) ai le tofiga o le afioga ia Laauli Leuatea Polataivao Fosi, o le Minisita o Faatoaga ma Faigafaiva.
E lei mãmã le iloiloina o lenei mataupu talu ona faailoa faalaua itele moliaga ua aafia ai le afioga i le Minisita. E pei ona ou faailoa i le vaiaso na te’a nei, o le Faamasinoga o le malu lea faa-le-tulafono, e avanoa mo so’o se tagata Samoa e saili i ai le amiotonu. O le tulaga talafeagai lea e ao ona faagasolo i ai lenei mataupu.
Peitai, e i ai aafiaga o le Malo, ona o le tofiga fa’aminisita. O loo aiaia i le Faavae o le Malo Tutoatasi o Samoa ala faa-le-tulafono e faafoe ai tofiga taualoa o le Pulega Faatonu. E faapea foi ona faatulaga ai ma aulape mo nei tofiga ina ia faatumauina pea i le amio sa’o (integrity) ma le tauleleia.
Na sa’ausi le laolaoina o lenei mataupu ma le afioga i le Minisita i lenei vaiaso, ma faailoa manino i ai filifiliga e lua mo ia, e pei ona aiaia i le Mataupu 33(3)(e)(o) o le Faavae. O le filifiliga e faamavae mai lona tofiga, atoa ai ma le filifliga e faamuta lona tofiga.
O le filifiliga e faamavae mai le tofiga, sa filifilia e le afioga i le Minisita ina ua faatulai ni moliaga e faasaga i a te ia i le 2017, a o avea ma Minisita o Faatoaga i lena vaitau. Peita’i, ina ua tapã lona finagalo e faamavae mai lona tofiga i le mataupu lenei, na te le’i taliaina.
Ma i le iloiloina toto’a o lenei mataupu, ua taunuu ai i la’u faaiuga e faamuta le tofiga o le Minisita o Faatoaga ma Faigafaiva e pei ona tauave e le afioga i a Laauli Leuatea Polataivao Fosi, e tusa ai ma le Mataupu 33(3)(e) o le Faavae.
E afua atu le faamamaluina o lenei faaiuga i le aso, Aso Faraile, 10 Ianuari 2025.
E mulimulitaia aiaiga o Tulafono ma Faiga Faavae a le Malo i tulaga o le Ofisa ma meatotina o loo faaaogaina mo le tofiga.















